WANSATI A NYAMALA EGIYANI

Hi Themba Chauke

Maphorisa ya le Giyani ya simekile pfhumba ra musecho wa wansati wa malembe ma 24, Tlharihani Ntimane lokusuka emugangeni wa ka Nkurhi Sefasonke ehandlenyana ka doroba ra Giyani.

Ku ya hi vuxokoxoko lebyi kumekeke, Ntimane u sukile ekaya hi siku ra ti 28 Nyenyenyani, ku ya endzela xaka rakwe elokixini ra le Giyani ti E. Ku vuriwa leswaku u fikile tanihilaha a kunguhatile hakona, laha a nga tshama siku hinkwaro, a nga si teka rendzo ro tlhelela ekaya.

Hambiswiritano, a nga ha fikanga ekaya. Vandyangu va tekile nkarhi ku n’wi tivisa tanihi munhu la nyamalaleke hikuva a va tshembha leswaku wa ha ri eka xaka rakwe, va nga swi tivi leswaku u sukile ku teka rendzo ro tlhelela ekaya.

Kusukela kwahalaho, a swi tiveki leswaku a nga va a helerile kwihi. Swiambalo leswi a swi ambarile loko a nyamalala a swi tiveki. Matshalatshala ya vandyangu ku n’wi lava eka maxaka na vanghana a ya tswalanga mihandzu.

Ku na swivilelo swa leswaku swa endleka a komberile lifiti eka movha wa sweigevenga, tanihileswi ndhawu leyi vanhu va kombelaka tilifiti to ya emugangeni wa ka vona ti tivekaka ti ri nghozi. Un’wana na un’wana loyi a nga pfunaka hi vuxokoxoko a nga tihlanganisa na Sejeni Frederic Wisani Mhlanga, eka 082 729 0351 kumbe 08600 10111.

Kasi eka yin’wana mhangu, maphorisa ma pfurile nandzu wa ku hundza emisaveni ka munhu endzhaku ka ku kumeka ka ntsumbu wa wanuna enambyeni wa Ritavi emugangeni wa ka Mapuve hi Ravuntlhanu ra ti 06 Nyenyankulu 2026. Ku ya hi xitatimende xa maphorisa, va kumile xiviko xa leswaku ku na ntsumbu wa munhu lowu papamalaka enambyeni lowuya.

Maphorisa loko ma fika ma kumile ntsumbu wa wanuna wa malembe ya kwalomu ka 45, a ambarile xikipa xa ntima na xirhangisi xa buraweni. Wanuna loyi a nga tiveki, na swona lava nga lahlekeriwa hi xaka kumbe byin’wana vuxokoxoko lebyi nga pfunaka va nga tihlanganisa na Sejeni Frederic Wisani Mhlanga, eka 082 729 0351 kumbe 08600 10111.