NKAYIVELO WA MAFURA WU HUNGUTA NKHULUKO WA TIMOVHA

Hi Themba ChaukeMeyara wa Masipala wa Giyani, Thandi Zitha, a rhangerile pfhumba ra vuhlayiseki bya le magondzweni hi Paseka, laha a ku langutisisiwa eka tindhawu leti nga na nkhuluko wa le henhla wa timovha eGiyani. Eka pfhumba leri ku tekiwile timovha ta tsevu, laha to tala ta kona a ku ri swibazana, hikwalaho ka ku tsandzeka ku fikelela swilaveko swa vuhlayiseki bya le magondzweni.

Milandzu ya kona a yi katsa ku rhwala ku tlula mpimo, maphepha ya timovha ma hundzeriwe hi nkarhi eka swin’wana. Hambileswi a ku ri na nhlayo ya le henhla ya maphorisa, nkhuluko wa timovha a wu ri ehansi ku tlula leswi a ku languteriwile hakona loko ku fananisiwa na malembe lama hundzeke hi nkarhi lowu fanaka.

“Nkhuluko wa sweswi wu fana na loko ku herile n’wheti,” ku hlamusela Meyara.

“A hi ehleketa leswaku hi nkarhi wo fana na lowu xiyimo a xi ta tika, hi swona leswi endleke leswaku hi fika laha ku ta fambisa mafambelo ma timovha. Hi hlamariswile hikuva hi kumile leswaku a hi leswi a hi swi languterile,” u ya emahlweni, laha a vuleke leswaku kusukela loko va tirha nimixo ku fika nimadyambu, xiyimo a xi cinci.

Ku vuriwa leswaku ku enhla ka nkhuluko wa timovha swi endliwa hi vukalo bya mafura etikweni, leswi endleke leswaku vanhu vo hlaya va xava mafura loko nxavo wu nga se tlakuka hi ti 01 Dzivamusoko 2026, leswi endleke leswaku tindhawu to hlaya to chela mafura eGiyani ti pfumala mafura.

Hi nkarhi wa pfhumba, Meyara a kambela timovha, a hlaya nhlayo ya vakhandziyi, na maphepha lama hundzeriweke hi nkarhi. “Hi kotile ku yimisa mathekisi yo hlaya, laha van’wana a va rhwele ku tlula mpimo na maphepha lama hundzeriweke hi nkarhi,” ku vula yena, laha a kombeleke van’wamathekisi ku landzelela milawu ya le magondzweni.

“Hi twisisa leswaku leyi hi yona ndlela leyi vachayeri va endlaka mali yo hlaya, kambe swi na nxungeto wa le henhla eka vuhlayiseki bya vakhandziyi. Loko ku humelela nghozi, swi nga endla leswaku ku lova vanhu vo hlaya,” ku vula Meyara. U tshikelerile leswaku xikongomelo xa Masipala a ku nga ri ku kavanyeta matirhelo ya mathekisi, kambe ku tiyisisa swileriso swa milawu ya le magondzweni. “A hi lwi na van’wamathekisi, kambe va fanele ku landzelela milawu ya le magondzweni, va fanele ku rhwala nhlayo ya vanhu lava faneleke, ku nga ri ku hundzisa,” wa gimeta.