TZANEEN UNITED YI TLANGA KU RINGANA NA VONDWE

Hi Themba  Chauke

Tzaneen United yi humile kusuka eka xiyimo xa vumbirhi ku ya eka xiyimo xa vunharhu endzhaku ka ku lahlekeriwa hi mikutlunya ya nkoka loko yi tlanga ku ringana na xipano xa Vondwe XI Bullets eka ntlangu lowu a wu tlangeriwa kule na le kaya. Loko va kongoma eka ntlangu lowu, xipano a xi swi tiva leswaku Vondwe XI Bullets xi nga va nyika ntlhontlho swinene, ngopfu-ngopfu loko xi tlanga ekaya. Kasi ku tlanga ku ringana a ku nga ri mbuyelo wo biha

Ehandle ko tlanga hi mikateko yo hlaya, va tsandzekile ku howisa, laha va gimete ntlangu hi 0-0, leswi endleke leswaku va hundziwa hi nkateko wo lwela xidlodlo. Ku lahlekeriwa ka vona hi mikutlunya yimbirhi swi pfurile nyangwa eka Dolphins, lava hluleke Musina United hi 2-0.

Dolphins, lava a va salerile endzhaku ka Tzaneen United ku nga se tlangiwa ntlangu, va tlakukile hi nkutlunya wun’we ku hundza Tzaneen United, lava sweswi va nga na mikutlunya ya 34 eka mitlangu ya 19, loko Dolphins yi ri na 35 eka mitlangu leyi ringanaka. Loko ku ri Mpheni Home Defenders, leyi rhangeke emahlweni, yi ya emahlweni emaninginingini endzhaku ka ku hlula Mukondeni Young Chiefs 2-1, ku ya rhanga hi mikutlunya ya 47 ehenhla ka mitlangu ya 19.

Matlangelo ya vona ma pfurile vangwa lerikulu exikarhi ka vona na swipano leswi saleke endzhaku, leswi endleke leswaku va tikuma va ri eka xiyimo xa kahle loko nguva yi fika emakumu. Mpheni yi tikomba yi ri eka ku lawula ligi leyi hambi yo hluriwa eka mitlangu hinkwayo leyi saleke.

Eka tshaku ra tafula, Labash Academy yi ha ri eku tikeriweni endzhaku ka ku hluriwa hi Phalaborwa United hi 2-1. Ku lahlekeriwa loku swi yi siya yi dzikile ehansi ka tafula ra ligi, leswi nga endlaka leswaku yi tsemiwa hi xihloka loko nguva yi fika emakumu.

Eka tlhelo rin’wana, Nkowankowa Continental yi kombisile ku pfuka kusukela loko ku thoriwile mudzaberi wuntshwa, leswi tiseke matlangelo yo hambana endzhaku ka ku hlula Baduzah Celtics 3-1, ku yisa emahlweni matlangelo ya yona lama kahle. Leswi swi endle leswaku xipano xi huma eka xiyimo xa xihloka, xi tlhela xi kuma ntshembho wo pona xihloka. Kasi nyimpi yo lwela ku papalata ku tsemiwa hi xihloka se yi le xikarhi ka Labash Academy na Tshakhuma Tsha Madzivhandila, swipano leswi nga le ka ntshikelelo wo tsemiwa hi xihloka, naswona swi tikomba leswaku swipano leswi swi ta tikeriwa ku huma eka xiyimo lexi.