MASIPALA WU VEKISA R2.6M EKA MITLANGU

Hi Themba Chauke

Masipala wa Giyani wu vekile etlhelo R2.6 wa timiliyoni ku ya eka thonamete ya Khapu ya Meyara, leswi ku vuriwaka leswaku i ku tinyiketela ka masipala ku hluvukisa mitlangu ya vantshwa na ku kuma vuswikoti etindhawini hinkwato ta masipala.

Thonamete ya lembe na lembe i nkombiso lowukulu wa mitlangu eka masipala laha ku nghenelelaka tiwadi hinkwato ta 31 leswi nyikaka nkateko eka madzanadzana ya vantshwa ku kombisa vuswikoti bya vona. Mphikizano lowu wu ya wu tlakuka kuya hi malembe na swona wu koka rinoko eka van’wamatsambu va vantshwa lava welaka ehansi ka masipala na swona wu koka rinoko na le ka vaseketeri vo hlaya eMopani na le tindhawini tin’wana.

Loko a nyika xitiviso hi nkarhi wa mpimanyeto wa lembe ximali ra 2026/27, Zitha u vule leswaku vuvekisi lebyi byi kombisa ku tshembha ka masipala eka mitlangu tanihi xitirhisiwa xa nhluvukiso wa vantshwa, vun’we bya vaaki na ku tlakusa miganga. “Leswi hi swona swi kombisaka leswaku thonamete yi ta va kona hambi ndzi fambile. Lava nga ta teka matomu kusuka eka mina va ta yisa emahlweni na ntirho lowu tanihileswi wu nga na xiave lexikulu loko swi ta eka ku tlakusa mitlangu eka masipala,” ku vula Zitha.

U vule leswaku khapu ya meyara yi tisile ku cinca eka ku hoxa xiave eka nhluvukiso wa vuswikoti bya vaaki, laha van’wana lava ngheneleke mphikizano lowu va kumeke mikateko yo ya tlangela swipano swa le henhla. Kuya hi yena, thonamete i xikombisa xa ku pfula tinyangwa eka van’wamatsambu lava nga na milorho yo ya tlanga ehenhla. Zitha u tlhele a kombisa ku kula ka ndhuma ya mphikizano, laha a kombiseke leswaku thonamete leyi ya ha ku helaka yi endlile matimu hi vaseketeri va le henhla loko ku fananisiwa na tithonamete tin’wana, leswi kombisaka ku kula ka thonamete lembe na lembe.

U tlhele a teka nkarhi ku hoyozela vahluri eka thonamete leyi hundzeke ku nga Makosha Wonder Boys kusuka eka wadi 14 lava hluleke eka mphikizano wa bolo ya milenge ya va xinuna, loko Bon’wani Ladies ya le wadi 20 yi hlurile eka mphikizano wa bolo ya milenge ya va xisati.

Meyara u tlhele nakambe a hoyozela xipano xa netball xa the Queens kusuka eka wadi 30, lava hluleke eka xiyenge lexi, a tlhela a navelela swipano hinkwaswo leswi nga ta fikelela mphikizano wa thonamete ya lembe leri ku va na thonamete ya kahle.

Kuya hi meyara, swin’wana swa matimba ya thonamete leyi i vuswikoti byo hlohletela ku kuma vuswikoti kusuka ehansi. U vule leswaku tikhanselara na vaaki va tlanga xiave xa nkoka eka mhaka leyi hi ku kuma na ku letela van’wamatsambu va mundzuku. “Ku tinyiketela ka hina loku nga tsekatsekiki eka migingiriko ya mitlangu i vumbhoni hi ndlela leyi hi seketelaka mitlangu hakona eka swiyenge swo hambana-hambana, kusuka eka swipano swa vaaki kuya eka swipano swa rixaka, laha hi tirhaka tanihi rivala ro lulamisela laha mitlangu yi hanyaka kona,” ku vula yena.

Loko migingiriko yo lulamisela thonamete leyi se yi sungurile, masipala wu tshembha leswaku vuvekisi lebyi a byi nge tiyisisi ntsena mphikizano kambe byi ta tlhela byi hlohletela na vantshwa ku yisa emahlweni milorho ya vona ya mitlangu, leswi hoxaka xandla eka rihanyo na miganga ya nkhinkhi.