VAAKI VA RILA HI MATI

Hi Andrew Hlongwane

Vaakatiko va muganga va Lusaka kusuhi na Nkowankowa ehandlenyana ka doroba ra Tzaneen va endlile pfhumba ro lavisisa xiphiqo lexi endlaka leswaku va kala mati ku tlula tsevu wa tin’hweti loko van’wana hetile lembe va ri hava mati.

Kambe pfhumba leri ri kombisile leswaku ku kayivela ka mati emugangeni wa vona swi vangiwa hi mphakelo wo ka wu nga ri enawini wa mati eNkomanini.

Ku vuriwa leswaku va Mopani va endlile xihoxo xo engetela phayiphi ku ya phakela va le Nkomanini mati kambe va tlhela va pfumelela muakatiko un’wana na un’wana leswaku a ya ti thumelela.

Loko va phephahungu ra Nthavela hi vhakela ndhawu leyi pfuxaka hansahansa hi kumile tiphayiphi ta nhlayo ya le henhla swinene na kona ti lo n’walala erivaleni.

Xin’wana xiphiqo eka tiphayiphi leti i ku va ti hetelela ti vavisiwa hi timovha kumbe ti tsemiwa hi makhamba va ti yiva va ya xavisela va n’wana.

Van’wana va vaakatiko lava nga khumbeka swinene tatana Sam Manave, tatana France Mathebula xikan’we na tatana Thomas Mkhari va endlile nhlengeletano na vaakatiko van’wana na va masipala wa xifundzantsongo xa Mopani kuya kombisana hi xiphiqo lexi. Leswi swi tisile ku hambana swinene emugangeni wa Lusaka ehandle ko kombana hi tintiho.

Vaakatiko va twananile hi ku cincana hi mapfulelelo ya mati ku nga leswaku va pfulela masiku mambirhi eLusaka va tlhela va pfala va pfulela va le Nkomanini.  Endzhaku ka hlengelatano lowu va Mopani va tshembisile ku endla kuya hi swileriso. Namuntlha vaakatiko va kota na ku ya entirhweni va hlambile.

Kambe va tlakusela va tatana lava nga titsona swotala va tlhela va tshika migingiriko ya mindyangu ya vona va ya lwela muganga.