TSAKANI A VA XIPHEMU XA VAN’WAMBHURHI 

Hi Themba Chauke

Endzhaku ka ku kuma xitiviso xa leswaku u ta va a nghena eka nxaxamelo wa vanhu va 30 eka mphikizano wa Van’wambhurhi va Afrika-Dzonga wa lembe ra 2026 lowu tivekaka tanihi Mrs South Africa, Tsakani Mangolele se u tlhomile tihlo eka mphikizano lowu nga ta khomiwa hi Hukuri lembe leri. Enkarhini wa sweswi u le ku tilulamiseleni tihlengeletano to hlaya leti a faneleke ku tinghenela, leswi tlhelaka swi katsa na ku teka swithombhe, tihlengeletano ta vuleteri, xikan’we na migingiriko yo nyikela eka tin’hweti leti landzelaka.

Tsakani u kulerile emugangeni wa le Tiyani eHlanganani, kwala xifundzenikulu xa Limpopo, na swona u na malembe ya 11 a ri karhi a tshama ePolokwane, laha a endlaka kona migingiriko yakwe ya mabindzu, laha a nga thwasela tidyondzo ta Vufambisi bya Tiphurojeke. Tsakani u tekiwile na swona u na vana va Mune. I munhu loyi a rhandzaka ku tinghenelerisa eka mapfhumba ya vaaki, leswi katsaka ku seketela vantshwa va xisati eka mitlangu.

Kusukela loko a nghenerile pfhumba ra mphikizano wa van’wambhurhi eka Mrs South Africa emasungulweni ya lembe, wa ha tiyimiserile ku fikelela swikongomelo swa yena swo hlohletela vantshwa va xisati ku va na milorho leyikulu hi ku tirhisa matimba ya dyondzo na mitlangu. Ku tinyiketela na ku tiyimisela ka yena swi n’wi hakerile namuntlha, endzhaku ka ku kuma xiyimo xo nghena eka tifayinali ta mphikizano wa 30 wa vanhu eka Mrs South Africa 2026.

“Xitiviso lexi i milorho leyi hundzukeke ntiyiso na ku va xitsundzuxo xa leswaku ku va na xikongomelo, ku tiyisela na ripfumelo swi pfula tinyangwa. Ndza tshembha leswaku rendzo leri ri ta hlohletela vavasati ku titshembha na ku hlohletela vantshwa va xisati ku vona dyondzo na mitlangu tanihi ndlela yo tisa ntshembho, vurhangeri na mikateko,” ku vula Tsakani.

Rendzo ro ya eka tifayinali ta vanhu va 30 eka mphikizano wa Van’wambhurhi va Afrika-Dzonga,  ri endliwile eka ntirho wa tisemifayinali hi siku ra 02 ku fika 04 Mawuwani 2026, eHotela ya Sky eSandton. Eka ntirho lowu wa masiku manharhu, a ku lulamisiwa, ku antswisiwa ka munhu, ku dyondza na ku hlangana na van’wana. Vatekaxiave a va tirhisana swin’we eka mijikajikisano ya vurhangeri, swiyenge swo hlawuleka swa vuleteri, swivutiso, xikan’we na nkombiso wa vumbhurhi exitejini leswi tiseke nyayulo, ku biwa mikhwela na swivuvutani hi ntshungu lowu a wu hlohletela van’wambhurhi lava a va fanele ku hlawuriwa kuya eka tifayinali ta mphikizano hi Ravutlhanu 03 Mawuwani 2026.

Ntirho wa masiku manharhu kusuka hi Mugqivela wa ti 04 Mawuwani ku fika Musumbhunuko wa ti 6 Mawuwani 2026, a wu kongomisiwile eka tihlengeletano leti a ti rhangeriwa hi vativi eka swiyenge swa vuhlanganisi, mabindzu na vutihlamuleri bya vaaki. Vatekaxiave va tlhele va nghenelela eka ntirho wo sungula wo teka swithombhe tanihi vatekaxiave eka tifayinali ta mphikizano wa Mrs South Africa 2026, ku katsa na ku teka tivhidiyo ku va seketela eka ku titlakusa na le ka swiyenge swa mabulo eka rendzo ra vona.

“Hi siku ra nkombiso, vaavanyisi a va lava ku vona swikombiso swa ntiyiso swo enta na ku kula eka migingiriko na vurhangeri bya wansati un’wana na un’wana eka mphikizano.” Ku vula Joani Jacobs, Mufambisinkulu wa Mrs South Africa. “Leswi va tikhomisaka xiswona eka mapfhumba yo hlaya ya ntirho lowu na le xitejini swi na nkoka swinene, kambe leswi hi swi langutisisaka i mitirho leyi va yi endlaka emigangeni ya ka vona, ku cinca loku va ku endlaka eka vutomi bya vanhu, xikan’we na maendlelo ya vona ya vurhangeri.”

Tanihileswi swi tivekaka hi MBA ya vutomi, pfhumba ra Mrs South Africa ri kongongomisiwile eka ku nyika vavasati lava nga le vukatini va malembe ya 25 kuya eka 55, switirhisiwa swa nkoka eka vurhangeri, ku katsa na ku tihlanganisa na van’wana hi maendlelo ya kona ya vunghana bya vavasati lebyi yaka emahlweni endzakhu ka loko xidlodlo xi hundzerile kun’wana.

Kuya hi Jacobs, xikongomelo i ku thwasisa vatekaxiave lava nga ta va na vuswikoti byo khomeka ku hoxa xandla eka mitlhontlho ya ikhonomi ya vaaki na mapfhumba yo cinca vutomi bya vanhu. Vatekaxiave vo hlaya va tlhela va simeka mihlangano ya vona yo hluvukisa vaaki ku hoxa xandla eka mitlhontlho leyi tiko ra Afrika-Dzonga yi hlanganaka na yona.