MASIPALA WU XAVISA SWIFUWO

Hi Themba Chauke

Masipala wa Giyani wu ya emahlweni na makungu yo xavisa swifuwo leswi vinyi va swona va nga swi koxangiki endzhaku ka masiku ya 21 loko swifuwo leswi swi tekiwile hi masipala endzhaku ka ku tsendzeleka na magondzo ya Giyani swi nga ri na muhlayisi kuya hlayisiwa endhawini yo hlayisa swifuwo swo tsendzeleka leswi tekiweke hi masipala.

Enkarhini wa sweswi masipala wu khomile kwalomu ka timbuti ta 20 na timbhongholo timbirhi exitichini xo hlayisa wifuwo swo tsendzeleka leswi tekiweke. Nhlayo ya timbuti yi tlakukile ku suka eka nkaye eka leti a ti tekiwile emasungulweni, loko tin’wana timbuti ti tswaleriwile endzeni ka ndhawu leyi, na swona kuhava vinyi va swifuwo leswi lava kombiseke leswaku swifuwo leswi i swa vona eka nkarhi lowu pimiweke wo koxa swifuwo loko swi tekiwile.

Ehansi ka mafambiselo ya masipala, vinyi va swifuwo va nyikiwa masiku ya 21 ku tiyisisa na ku koxa swifuwo swa vona leswi tekiweke. Loko nkarhi lowu wu herile ehandle ka ku va swifuwo swi koxiwa, masipala wu nga ha teka magoza ya ku swi xavisa, loko ku landzeleriwile maendlelo lawa.

Masipala sweswi wu le ku tirheni ku sungurisa na ku hetisisa matirhelo yo thola muxavisi loyi a nga ta va na vutihlamuleri byo fambisa ntirho wo xavisa swifuwo leswi. Muvulavuleri wa masipala wa Giyani Steve Mavunda, u vule leswaku migingiriko yo xavisa swifuwo yi sunguriwile lembe leri hundzeke kambe wu hlwela hikwalaho ka vufambisi bya le ndzeni ka masipala.

“Hi ntolovelo endzhaku ka masiku ya 21 loko swifuwo swi tekiwile, masipala wu na matimba yo swi xavisa. Enkarhini wa sweswi, masipala wu le ka migingiriko yo rhumela xikombelo ku sungula ku thola muxavisi loyi a nga ta swi xavisa,” ku vula Mavunda.

U vule leswaku xikombelo lexi a xi rhumeriwile enkarhini lowu hundzeke xi fanele ku lulamisiwa tanihileswi nhlayo ya timbuti leti yi tlakukeke kusukela loko xikombelo xo sungula xi endliwile, laha a kombiseke leswaku ntirho lowu sunguriweke lembe leri hundzeke wu ya emahlweni.

“Xikombelo xi ta lunghisiwa endzhaku ka loko xi rhumeriwile eka xiyenge xa swa timali xa masipala ku thola muxavisi, ngopfungopfu hikuva ku tswariwile timbuti tin’wana kusukela loko ku rhumeriwile xikombelo xo sungula,” ku vula yena.

Maendlelo ya masipala ya languteriwa ku fikisa emakumu ku tshama nkarhi wo leha ka swifuwo leswi nga koxiwangiki endzhaku ka ku tekiwa hi masipala ku ya vekiwa endhawini ya vuhlayiselo bya swifuwo ya masipala.

Leswi swi kombisa ntlhontlho lowu masipala wu hlanganaka na wona loko swifuwo leswi tekiweke swi nga koxiwi hi vinyi va swona, ngopfungopfu loko swifuwo swi tshama nkarhi wo leha, swi tlhela swi tlakuka eka nhlayo, leswi engetelaka tihakelo ta swakudya swa swifuwo.