MPHENI YI HLULA TZANEEN UNITED HI MBHOVO WA NAYITI

Hi Themba Chauke

Xipano xa Mpheni Home Defenders xi kotile ku sirhelela mikutlunya hinkwayo endzhaku ka ku lwa nyimpi yo tika ku hlula xipano xa Tzaneen United hi 1-0 eka Ligi ya ABC Motsepe Xitirimu xa A, eka ntlangu lowu a wu tika swinene erivaleni ra mitlangu ra ka Malamulele hi Mugqivela.

Ntlangu lowu a wu ri xiphemu xa mitlangu ya tsevu eka ligi leyi, wu kombisile ku va ntlhontlho eka swipano haswimbirhi, laha a ku pfumaleka xipano lexi a xi lava ku gova.

Hambileswi Mpheni yi fambeke na mikutlunya hinkwayo, Tzaneen United a ku nga ri xipano xo dya byi rhelela naswona xi kombisile ku tiyimisela eka ntlangu hinkwawo. Hambiswiritano, matshalatshala ya vona a ma nga ringanelanga ku kuma mbuyelo lowu a va wu lava endzhaku ka ku tsandzeka ku howisa eka mikateko leyi a va yi kuma.

Ntlangu na wona a wu ri na milomo hikwalaho ka swiboho leswi a swi tekiwa hi n’watipepe leswi a swi tshamela ku siya vatlangi va Tzaneen United va hlundzukile. Xipano a xi kombisa ku ka xi nga tsakisiwi hi swiboho leswi a ku vuriwa leswaku swi yima na vaphikizani va xona, leswi a swi tisa swivilelo hi mafambiselo ya ntlangu.

Ehandle ko vilerisiwa hi swiboho swin’wana swa n’watipepe, Tzaneen United a yi tlanga yi ya emahlweni ku ringeta ku boxeketa hi ku tirhisa mikateko leyi a yi yi kuma, Hambiswiritano va hlulekile ku hundzula mikateko leswaku yi va swikoro, eka matshalatshala ya vona yo hlasela.

Xiphemu xo sungula xi herile ku nga ri na xipano lexi nga howisa, leswi endleke leswaku swipano swi ya eku wiseni hi ku ringana. Mpheni yi vuye yi kuma xikoro hi minete ya vu 65, leyi a ku ri golo yi ri yoxe ya ntlangu. Golo yi endlile leswaku ku va yona leyi hambanyisaka swipano leswi endleke leswaku Mpheni yi hlula hi mbhovo wa nayiti.

Kasi Tzaneen United yi ringetile ku lwa hi matimba ku vuyela eka ntlangu, laha a yi ringeta kuya emahlweni ku kuma xikoro xo ringanisa hi timinete to hetelela. Hambiswiritano vatlangi va le ndzhaku va Mpheni a va yimile va tiya ku kondza mpepe yo hetelela yi ba.

Ku hlula ka Mpheni swi endlile leswaku va kuma mikutlunya ya nkoka eka ligi, loko Tzaneen United va sale va hlundzukile ehandle ka matlangelo ya vona ya kahle.

Kasi hi hala tlhelo, eka yin’wana mitlangu eka leyi ya tsevu ya vhiki eka ligi leyi, ku vile na matlangelo yo ringana eka swipano swo hlaya, laha swipano swo fana na Mukondeni Young Chiefs na Ramahantsha Blackpool va tlangeke ku ringana hi 1-1, loko Goue Seuns na Vondwe Xi Bulltes na vona va tlangile ku ringana hi 2-2.

Baduzah Celtics na Selwana White Vultures va tlangile ku ringana hi 1-1. Van’wana lava hluleke eka mitlangu ya mahelo ya i Nkowankowa Continental, leyi hluleke Musina United hi 2-1.