Angula yi antswisa vuhlanganisi bya Tindzimi
Hi Mkateko Ndlovu
Siku na siku, thekinoloji yi ya emahlweni yi ndlandlamuka, vutomi bya masiku lawa swilo swo tala swi humelela hikwalaho ka thekinoloji naswona thekinoloji yi olovisa swilo eka vutomi bya masiku hinkwawo. Mukondleteri Dumela hi un’wana wa vaaki lava va kondletelaka leswaku thekinoloji yi ndlandlamuka. Mukondleteri i wanuna loyi a humaka emugangeni wa ka Nyavani ehansi ka masipala wa Collins Chabane, naswona u thwasile eka tidyondzo ta
Vuhlanganisi eYunuvhesiti ya Pitori kambe u kombisa leswaku na vutivi bya thekinoloji u na byona.
Hambiswiritano Mukondleteri u endlile xihundzuluxi xa marito xa thekinoloji, lexi xi hundzuluxaka marito ku suka eka tindzimi tin’wana ku ya eka tin’wana. Mukondleteri u kombisa leswaku loko a ha ri exikolweni u sungurile ku endla xitirhisiwa xo hundzuluxa marito lexi a xi tiveka hi Xitsonga.org, lexi a xi dyondzisa vanhu ririmi ra Xitsonga. Hi ku vona leswaku mitirho ya yena yi pfuna vanhu, hi lembe ra 2021 u sungurile ku endla xitirhisiwa xa thekinoloji xo hundzuluxa marito hi ku tirhisana na Akani Dumela.
Xitirhisiwa lexi xi tiveka hi vito ra Angula. Angula yi pfuna ku hundzuluxa marito na ku hlayisisa marito ya Xitsonga na tin’wana tindzimi, hambiswiritano Angula i xitirhisiwa xa thekinoloji lexi nga na tindzimi to hambana-hambana ta Khume .Eka Angula vanhu va kota ku dyondza milawa ya tindzimi hi ku hambana-hambana ka tona.
“Lexi xi nga ndzi hlohlotela ku sungula xihundzuluxi xa marito i ku lava ku hlayisa ririmi ra manana na ku dyondzisa vanhu ririmi,” Mukondleteri wa hlamusela. Mukondloteri u kombisile hi mitlhotho leyi a hlangeneke na yona loko a ri ka rhi a tumbuluxa xitirhisiwa lexi xa thekinoloji xo hundzuluxa marito, “Macheleni hi wona a ya tika swinene hikuva a ndzi fanele ku lava vanhu vo ndzi pfuna ku hundzuluxa marito naswona a ndzi fanele ndzi va hakela. Hambiswiratano a hi amukela munhu u’nwana na un’wana loyi a lavaka ku hoxa xandla.
Ku hoxa xandla ka vanhu va vutivi byo hambana-hambana swi ta ndlandlamuxa tindzimi na vuhlanganisi bya ndhavuko,” wa engetela. Hi lembe ra 2023 Angula yi xiximiwile hi sagwadi ro antswa eka switirhisiwa swa dyonzo hi va MTN App.
