Nkatsakanyo wa Swiviko swa Maphorisa

Hi Themba Chauke

Maphorisa ya Lava Wanuna wa Ntlawa wa Swigevenga

Maphorisa ya endla xikombelo xa mpfuneto wo kuma wanuna loyi a tivekaka hi vito ra Junior Ndlovu. Maphorisa ya tshembha leswaku u ta pfuna ku kuma xintshuxo eka milandzu ya vugevenga leyi yi katsa ku phangha etindlwini xikan'we na ku xanisa hi timhaka ta masangu.

Leswi swi ta endzhaku ka loko vaaki va le mugangeni wa ka Hoveni, etindhawini ta le Maake ehansi ka xifundzhatsongo xa Mopani va hlaseriwile kusukela hi vusiku bya Ravutlhanu wa ti 09 Mudyaxihi 2025 ku fika matakuxa ya Mugqivela wa ti 10 Mudyaxihi 2025.

Swiviko swi kombisa leswaku kusukela hi awara ya 23:30 hi Ravutlhanu ku fika awara ya 02:00 hi Mugqivela, vaehleketeleriwa va sungurile ku endla vugevenga bya tihanyi no kala ntwelavusiwana, laha va nga hlasela mindyangu ya Nkombo ya muganga wun’we leswi ku tshembhiwaka leswaku a swi kunguhatiwile hi ku
hetiseka.

Vaehleketeleriwa lava a va hlomile hi swibalesa, va nghenile etindlwini hi nkani laha a va tshova tinyangwa, va koxa xuma na swin’wana swa nkoka eka vatwisiwakuvava, laha a va endla vugevenga byo chavisa, lebyi byi katsaka ku pfinya na vana lavantsongo.

Maphorisa ya le ku tirheni vusiku ni nhlikani ku kuma vaehleketeleriwa lava. Hi Musumbhunuko wa ti 12 Mudyaxihi 2025, maphorisa ya kumile tiqingo to hlaya na swin’wana swa nkoka emugangeni wa Callies, etindhawini ta le Maake.

Loyi a nga pfunaka hi Vuxokoxoko u komberiwa ku tihlanganisa na Warrant Officer Phaladi Makola eka 082 749 2233 kumbe Kolonele Richard Boshomane eka 079 894 5501 kumbe 08600 10111 na MySAPSApp. Vulavisisi bya maphorisa byi ya emahlweni.

N’wini wa Khemisi a nyikiwa Beyili eka Nandzu wa Vuxisi 

Wanuna wa malembe ya 40, loyi a khomiweke hi swihehlo swa vuxisi a tivonakarisile emahlweni ka Khoto ya Majisitarata wa ka Malamulele hi siku ra 12 Mudyaxihi 2025. Tinyiko Gift Mangolele u nyikiwile beyili ya R5000.00 naswona u ta tlhela a tivonakarisa ra vumbirhi emahlweni ka Khoto yo Hlawuleka ya Giyani hi ti 29
Mudyaxihi 2025.

Ku vuriwa leswaku hi n'hweti ya Dzivamusoko 2024, xikimu xa vutshunguri xa Mfumo lexi xi tivekaka hi GEMS, xi pfurile nandzu wa vulavisisi bya swikoxo swa vuxisi leswi swi endliweke hi muehleketeleriwa endzhaku ka loko a tihlanganisile na swirho swa xikimu lexi hi ku va tshembisa ku va vuyisela mali xikan’we na ndlela yin’wana yo kuma titanghu ta ka Green Cross.

Ku ya emahlweni, Tinyiko loyi a nga n'wini tlhelo mufambisi wa Khemisi eka Malamulele, u tirhisile vuxokoxoko bya Madokodela mambirhi ehandle ka mpfumelelo ku endla swikoxo swa mimirhi leyi yi lavaka swileriso swa madokodela.

Hikokwalaho ka vulavisisi byo enta lebyi byi endliweke, swi kumekile leswaku swirho swa GEMS, a swi nga endzelanga madokodela lawa ku endliweke swikoxo hi wona. Leswi swi koxile xikumu ku lahlekeriwa hi R910 000.00 exikarhi ka n’hweti ya Sunguti 2018 na n’hweti ya Ndzhati 2022.

Hi siku ra 12 Mudyaxihi 2025, muehleketeleriwa u batiwile hi swirho swa Xiyenge xa Vugevenga bya Mabindzu swa Xifundzhankulu etindhawini ta ka Malamulele. Vulavisisi bya maphorisa byi ya emahlweni.

Wansati a hundza emisaveni kusuhi na Ndhawu ya Byalwa.

Maphorisa ya Ritavi ehansi ka xifundzhantsongo xa Mopani ya le ku lavisiseni ka madlawele yo hlamarisa ya wansati wa malembe ya 30, loyi a kumekeke a hundzile emisaveni emugangeni wa Dan, eBindzulani kusuhi na vhengele ro xavisa byalwa hi siku ra ti 13 Mudyaxihi 2025.

Maphorisa a ya endla ntirho wo valanga loko va kuma xiviko xa ku dlawa ka munhu endhawini liya kutani va tsutsumela kona. Loko va fika va kumile wanuna loyi a va kombeke ntsumbu wa wansati lowu moya a wu hambanile ni nyama a etlerile ehansi wu ri ni mbanga yi tlhaviwa enhan’wini.

Swirho swa swilamulelamhangu swi vitaniwile eka mhangu leyi laha swi tiyisiseke leswaku humba yi olele nkuma loko swi fika. Mufi u tivisiwile tanihi Shelmah Malesa, leswi swi tiyisisiweke hi nuna wakwe loyi a nga muaki wa le Dan.

Xivangelo xa ku dlawa ka wansati loyi a xi se tiveka naswona loyi a nga na vuxokoxoko lebyi nga pfunaka a nga tihlanganisa na Warrant Officer Ronny Baloyi eka 0823199699 kumbe 0860010111, Maphorisa ya le kusuhi na MySAPSApp. Vulavisisi bya Maphorisa byi ya emahlweni.