Kereke ya le Amerika yi ala ku Amukela Ma-Afrikaaner
Hi Themba Chauke
Kereke ya le Amerika leyi yi tivekaka tanihi Episcopal, yi tivisile leswaku yi ta herisa vixaka bya 40 wa malembe na mfumo wa le xikarhi wa tiko ra Amerika wa ntirhisano yo nyika vutshamo bya vutumbelo, hikuva yi vula leswaku a yi nge swi koti ku amukela Ma-Afrikaaner ya le Afrika-Dzonga lava va vekiweke eka nxaxameto wa
vanhu lava lavaka mpfuno wa vutumbelo hi puresidende wa tiko leriya Donald Trump.
Kereke yi vula leswaku ku amukela Ma-Afrikaneer, a swi fambelani na mapfalo ya kereke. Mufambisi wa kereke liya, Rev. Sean W. Rowe, u vurile leswaku kereke yi kumile papila kusuka eka mfumo wa le xikarhi, leri a ri lerisa leswaku va fanele ku nyika vutshamo bya vutumbelo eka Ma-Afrikaaner, ku ya hi swipimelo swa nseketelo wa swa timali kusuka eka mfumo mavhiki mambirhi lamahundzeke.
Rowe u vurile leswaku xikombelo lexi xi tlula ndzilikani wa matirhelo ya kereke ya Episcopal, leyi yi welaka ehansi ka kereke ya Anglican, leyi yi tinyungubyisaka hi varhangeri vo fana na mufi Archbishop Desmond Tutu, loyi a tlangeriwaka swinene tlhelo mulweri wa vanhu wo lwisana na mfumo wa xihlawu-hlawu.
Kereke yi vula leswaku hikokwalaho ka maendlelo ya muxaka lowu hi mfumo wa le xikarhi etikweni leriya, wu ta herisa vuxaka na mfumo wa le Amerika loko lembeximali leri ri fika emakumu, hikuva a swi fambelani na matirhelo ya kereke.
Ntlawa wa 49 wa Ma-Afrikaneer va fikile etikweni leriya naswona va amukeriwile ximfumo hi vurhangeri bya tiko ra Amerika, laha va nyikiwaka kona vutumbelo, hikuva va vula leswaku va khomiwile hi voko ra nsimbhi etikweni ra Afrika-Dzonga, laha hi ku ya hi vona, ku nga na makungu ya ku herisa rixaka ra Ma-Afrikaneer hi
tiko ra Afrika-Dzonga.
Ku na mavonelo yo hambana-hambana hi mhaka leyi exikarhi ka tiko ra Amerika na tiko ra Afrika-Dzonga, laha mikandziyiso ya vanhu lava nyikaka mavonelo hi mhaka leyi yi hangalakaka na swihangalasa mahungu swo hambana-hambana.
