R100 000 ya Mudlayi wa Mufundhisi – kasi Venter a Balesela wansati

Hi Themba Chauke

Maphorisa ya tiko ya vula leswaku kuna ntsengo wa R100 000-eka munhu loyi a nga ta pfuna hi vuxokoxoko lebyi byi nga ta endla leswaku muehleketeleriwa loyi a khumbhekaka eka ku dlawa ka Mufundhisi wa kereke Roman Catholic William Banda wa malembe ya 36 a khomiwa. Mufundhisi loyi a dlaweke a ta a huma hi le tikweni ra Malawi, naswona a ri mufundhisi wa kereke ya Catholic eTzaneen. U dlawile hi ku baleseriwa hi nkarhi lowu a lulamisela xikhongelo hi siku ra 13 Nyenyankulu 2024 hi awara ya nhungu nimixo.

Swiviko swi kombisa leswaku hi siku leri, muehleketeleriwa loyi a nga tivekiki u fikile ekerekeni a tiendla mukhongeri. Kwalaho u humesile xibamu a balesela mufundhisi ko hlaya. Muehleketeleriwa u vuye a baleka hi movha wo basa wo pfumala ntsariso. Maphorisa ya fikile endhawini liya naswona mufundhisi u tiyisisiwile kuva a hundzile emisaveni hi vaswilamulelamhangu loko va fika. Ku pfuriwile nandzu wo dlaya laha vulavisisi bya maphorisa byi ya ka emahlweni.

Maphorisa ya tiko ya nyikela hi ntsengo wa R100 000-00 eka munhu loyi a nga ta nyika vuxokoxoko bya nkoka lebyi byi nga ta endla leswaku ku khomiwa muehleketeleriwa loyi a nga dlaya mufundhisi. Loyi a nga na vuxokoxoko a nga
tihlanganisa na phorisa Shai eka 082 465 2996 kumbe khomandara wa xifundzhankulu eka xiyenge xa milandzu yo dlaya na ku phangha Kolonele Tinyiko Shilenge eka 071 673 1814, kumbe 08600 10111, maphorisa ya le kusuhi kumbe MySAPSApp.

Eka yin’wana mhangu, muehleketeleriwa eka nandzu wo ringeta ku dlaya loyi vito ra yena ku nga James Venter wa malembe ya 42, a tivonakarisile nkarhinyana emahlweni ka khoto ya majisitarata wa Makhado, naswona nandzu wakwe wu hundziseriwile emahlweni ku ya eka Ravutlhanu wa ti 27 Khotavuxika 2025 ku yisa emahlweni vulavisisi eka mhaka leyi.

Ku vuriwa leswaku hi siku ra ti 20 Khotavuxika 2025, hi awara ka khumen’we na vusiku, muehleketeleriwa loyi wa xinuna ku nga murindzi eka khamphani ya varindzi u khomiwile eMakhado hi swihehlo swo balesela leswi swi nga endla leswaku wansati wa malembe ya 28 a vaviseka. Swiviko swi kombisa leswaku wansati a famba na ndyangu wakwe hi movha wa Toyota C-HR wa muhlovo wa silivhere kusuka eGauteng,

Kasi loko a fika mahambanwini ya tindlela ya Three-Mile egondzweni ra N1, movha wa vona wu yimisiwile hi movha lowu wu nga tivekiki. Muchayeri a nga yimanga hi ku ehleketelela timhaka ta vugevenga kambe a jika a tlhelela endzhaku. Movha wu fambile ku kondza wu teka ndlela leyi kongomaka eMakhado. Kwalaho movha wu sungurile ku baleseriwa leswi swi nga endla leswaku wansati a vaviseka.

Muehleketeleriwa loyi ku nga murindzi, u vuye a khomiwa laha mhangu yi nga humelela kona, Xibamu xa Siga 7.62 lexi ku vuriwaka leswaku xi tirhisiwile eka mhangu leyi xi tekiwile hi nkarhi wa ku khomiwa ka murindzi. Khomixinara wa maphorisa ya Xifundzhankulu xa Limpopo Lieutenant Jenerali Thembi Hadebe u sorile mhangu leyi.