Xigamatshuku Xi Hundza Emisaveni
Hi Themba Chauke
MEC wa Mfumo wa Nhlengelo, Vutshamo bya Vaaki na Timhaka ta Xinto nkulukumba Basikopo Makamu, u tshovekile mbilu hikokwalaho ka rifu ra jaha leri a ri ri engomeni exifundzenintsongo xa Sekhukhune
Raymond Sekele, jaha ra malembe ya 19, u hundzile emisaveni hi sonto wa ti 06 Mawuwani 2025, exibedlele xa Philadelphia laha a amukeriwile kona endzhaku ka ku hlangana na swirhalanganyi swa rihanyo hi nkarhi lowu a ri engomeni. Ku ya hi swiviko, swi kombisa leswaku mudzabi wa Sekele u kombisile hi nkarhi wa ku amukeriwa ka jaha leri engomeni leswaku ri na vuvabyi byo wa naswona a teka mimirhi ya vuvabyi lebyi. Ku vuriwa leswaku jaha leri ri khomiwile hi vuvabyi lebyi kwale ngomeni hi siku ra 02 Mawuwani 2025 laha ri koteke ku tlhela ri pfuka ri ya emahlweni na migingiriko ya le ngomeni ehandle ka swirhalanganyi.
“Ndzi tivisiwile leswaku hi siku ra ti 06 Mawuwani 2025, jaha leri a ri pfukanga tanihileswi a ri languteriwile ku pfuka na man’wana majaha ku fihlula swakudya swa nimixo” ku vula MEC Makamu, loyi a kombiseke leswaku mudzabi u ringetile ku n’wi pfuxa kambe a nga anguli naswona a heleriwa hi Moya. Kwalaho ku tivisiwile mayimbi na xolwe yakwe hi mhangu leyi. Ngoma yi tsundzuxiwile ku heleketa jaha leri exibedlele hi xihatla leswaku ri ta hloriwa hi madokodela. Loko jaha leri ri fika exibedlele xa Philadelphia, ri amukeriwile eka vutshunguri bya xihatla. Endzhaku ka nkarhi Mudzabi u tivisile hi ta ku hundza emisaveni ka Sekele.
“Hi tshovekile timbilu hi rifu leri, hikuva rifu rin’we ri vula swotala. Hi ku tirhisana na Ndzawulo ya Rihanyo, Xiphorisa xa Tiko, xikan’we na Xiyenge xa Vuchuchisi, hi lulamisile hinkwaswo ku tiyisisa leswaku a ku nge lahleki vutomi byin’wana. Hambiswiritano rifu leri i xikombiso xa leswaku hi fanele ku tirha hi matimba ku papalata mafu hi nguva ya ngoma,” Makamu u ya emahlweni laha a rhumeleke marito yo chavelela eka vandyangu hi nkarhi lowu wo tika.
Vandyangu va tiyisisile leswaku hakanene jaha leri a ri vabya vuvabyi byo wa naswona a ri teka mimirhi ya vuvabyi lebyi. Kasi Sekele a amukeriwile engomeni leyi nga le enawini eDennilton Uitspanning B (Magakadimeng), exifundzenintsongo xa Sekhukhune ehansi ka vulawuri bya Kgoshigadi Mathebe Morongwe Cathrine.