Vadlayi va DJ Sumbody va Tivonakarisa eKhoto

Hi Themba Chauke

Vanhu va mune lava hehliwaka hi ku dlaya Oupa Sefoka, loyi a tivekaka hi vito ra DJ Sumbody a va tivonakarisile ekhoto hi siku ra ti 22 Mawuwani 2025. Lava va hehliwa hi ku dlaya DJ Sumbody hi siku ra ti 20 Hukuri 2022, eWoodmead eJoni. Vahehliwa lava va katsa Michael Pule Tau wa malembe ya 55; Katiso Molefe wa malembe ya 61; Tiego Floyd Mabusela wa malembe ya 45 xikan’we na Musa Kekana loyi malembe ya yena ya nga boxiwangiki. Ku tlhela ku vuriwa leswaku Mabusela na Kekana a va ri exitokisini hi swihehlo swo ringeta ku dlaya Tebogo Thobejane loko va ta hlanganisiwa na nandzu wo dlaya DJ Sumbody.

Lava va khomiwile endzhaku ka swihehlo swa leswaku hi vona vadlayi, loko un’wana wa vona a leriseke ku dlawa ka DJ Sumbody hi nkarhi wo endla nandzu lowu. Ku balesela loku ku veke kona ku endlile leswaku ku dlawa Sefoka, Sibusiso Walter Mokoena xikan’we na Sandile Shawn Myeza. Vambirhi va hundzile emisaveni laha mhangu yi humeleleke kona loko wa vunharhu a ta hundza emisaveni exibedlele endzhaku ka nkarhi. Vaehleketeleriwa va langutanile na swihehlo swinharhu swo dlaya, Ku kumeka na xibamu na maqulu swo ka swi nga ri enawini. Nandzu wu hundziseriwile emahlweni ku ya eka siku ra ti 29 Mawuwani 2025, ku nyika mfumo nkarhi wo teka vuxokoxoko bya muehleketeleriwa loyi a endleke xikombelo xa beyili.

Hi hlala tlhelo, mfumo wu engeterile mueheketeleriwa un’wana eka nandzu wo ringeta ku dlaya Thobejane. Nthabiseng Nzama, i muhehliwa wa vuntlhanu, laha ku vuriwaka leswaku hi yena loyi a fambisa timali exikarhi ka tiakhawunti, naswona a swi tiva leswaku mali leyi i ya vugevenga. Nzama a tivonakarisile ekhoto naswona u nyikiwile beyili ya R10 000. Nandzu wakwe wu hundziseriwile emahlweni ku ya eka ti 26 Mhawuri 2025 leswaku a ta tivonakarisa na vahehliwa-kulobye.