Mphahlo Eka Altari ya Kereke

Hi Themba Chauke

Varhangeri va kereke ya Harvest Time eGiyani, va kombisile ku hlundzuka endzhaku ka ku kuma leswaku altari ya  kereke ya vona ti tirhisiwile ku endla mphahlo hi tin’anga ta xinto hi nkarhi wa ntirho lowu a wu khomeriwile ekerekeni liya.

Leswi swi ta endzhaku ka nkandziyiso wa vhidiyo lowu wu hangalakeke na swiyenge swa mabulo, lowu a wu kombisa tin’anga ta xinto ti tshamile ti ri ku yimbeleleni ka tinghoma ta magandzelo ya mandlhozi hi nkarhi wa nhlengeletano ya vandla ra tipolotiki ra Umkhonto weSizwe. Hambiswiritano, nkandziyiso lowu wu hela wu siya vahlaleri va nga tivi leswaku ku humelerile yini ku ya emahlweni.

Hi marito ya vukarhi, vurhangeri bya kereke byi fambela kule na mhango leyi, byi vula leswaku a byi nga swi tivi leswaku kereke yi tirhisiwile ku endla magandzelo hi tin’anga ta xinto. “Hambileswi muako wa kereke ya hina wu pfulekeke ku tirhisiwa hi vaaki ku hira, kambe hi siku ra ti 20 Ndzhati 2025, muako wa kereke ya hina wu tirhisiwile ehandle ka vutivi bya hina,” ku hlamusela xitatimende lexi xi nga sayiniwa hi Muapostola V.V Hlongwana.

 “Nkandziyiso wa vhidiyo lowu wu hangalakeke na swiyenge swa mabulo, swi tisile xivilelo ekerekeni. Mphahlo na maendlelo ya muxaka lowuya a swi nge amukeleki ekerekeni ya hina. Vurhangeri bya kereke a byi seketeli kumbe ku tlakusa maendlelo ya muxaka lowu,” ku hlamusela xitatimende.

Kereke yi yile emahlweni yi tiyisisa leswaku yi yima hi ripfumelo ra Xikreste naswona a yi nge pfumeleri leswaku ndhawu ya yona yi tirhisiwa tanihi ndhawu ya madimoni.

 “Loko hi khensa kuva nhlangano lowu wu khumbhekaka wu tile eka hina ku ta hi hlamusela hi maendlelo lawa ya madimoni xikan’we na ku kombela ndzivalelo, hi lava ku tiyisisa leswaku kereke yi kanetana swinene na leswaku kereke ya hina yi nga ha tirhisiwa ku endla mphahlo hikuva hi pfumela eka Hosi na Muponisi Yeso Kreste. Hi ta ya emahlweni hi khongelela mikateko na ku humelela hi Vito ra Matimba ra Yeso Kreste,” Muapostola Hlungwana u ya emahlweni.

Kasi vandla ra Umkhonto weSziwe eka Xifundzhankulu xa Limpopo, ri komberile ndzivalelo na le ka vaaki, laha ri nga hlamusela leswaku mhango leyi a yi nga kunguhatiwanga xikan’we na ku tisola eka ku hambana hi miehleketo loku ku veke kona.

 “MKP ye le Limpopo, yi rhumela marito ya ku tisola eka vurhangeri, kereke xikan’we na ndyangu hinkwawo wa kereke ya Harvest Time eka leswi swi humeleleke eka ntirho wa xikhongelo xa Siyabalanda lowu a wu khomiwile hi siku ra 20 Ndzhati 2025,” ku vula mukondleteri wa vandla eLimpopo, John Ngobeni eka xitatimende.

Ngobeni u kombisile leswaku mhango leyi yi sukela eka xiphemu lexi a xi nga ri kona eka xiyenge xa ntirho. “Hi nkarhi wa ntirho, xiphemu lexi a xi nga kunguhatiwanga xi nghenisiwile: Ku nga ku amukeriwa ka tin’anga ta xinto. Xiphemu lexi a xi nga weli eka xiyenge xa ntirho, leswi swi endleke leswaku kereke yi nga khomeki kahle,”

Ngobeni u swi vekile erivaleni leswaku a ku na mphahlo lowu endliweke naswona tin’anga ta xinto a ti lo nyikiwa nkarhi wo ya xeweta vurhangeri bya vandla ra MK. “Khombo ra kona hi leswaku a va nga hlamuseriwanga ku hambanyisa altari yo kwetsima ya kereke na ndhawu ya mphahlo, leswi swi endleke mhango leyi,” Ngobeni u ya emahlweni.

 “Tanihi varhangeri va xifundzhankulu eka vandla, hi teka vutihlamuleri hinkwabyo bya kuva hi nga swi tekelanga enhlokweni na ku tisola eka ku khunguvanyeka loku ku veke kona. A ku nga ri xikongomelo xa hina ku tekela ehansi vukwetsimi bya kereke xikan’we na leswi kereke yi yimeleke swona,” wa gimeta, laha a kombiseke leswaku vandla ra MK ri ta ya emahlweni na vuxaka bya kereke ya Harvest Time hi nhlonipho na ku tshembhana xikan’we na vukhongeri bya Xikreste hi ku angarhela.