NHLOKO YA XIKOLO A DYA MALI

Hi Pilot Manganyi

Murhangeri wa xikolo xa Boxahuku emugangeni wa Maviligwe u hehliwa hi ku yiva mali ya vatirhi va xikolo yo ringana R700 000, na ntsengo wo hundza R300 000 leyi dyiweke hi vatirhi van’wana. Mali leyi i mali leyi a yi fanerile ku hakela vatirhi lava a va lo tinyiketela ku tirhela xikolo hi ku swekela vana, ku basisa jarata, xikan’we na ku rindza xikolo. Vukungundzwana lebyi byi endliweke ehenhla ka mali leyi byi endlile leswaku vatirhi va nga holi ku ringana tin’hweti ta ntsevu na ku hundzisa. Mhango leyi yi endlile leswaku vatswari va vana va sala va hlundzukile hikokwalaho ka matikhomelo ya nhloko ya xikolo.

Mali leyi ku hehliwaka kuva yi dyiwile i mali leyi hlengeletiweke hi vatswari lembe na lembe. Xikolo xa Boxahuku xi amukela vana vo hundza 2 000 hi lembe. Vatswari va languteriwile ku humesela vana va vona ntsengo wo ringana R80 hi nhloko loko lembe ri sungula. Ntsengo lowu wu humesiwaka hi vatswari wu languteriwile ku hakela vatirhi lava va tinyiketeleke ku tirhela xikolo tanihiloko va nga hakeriwi hi mfumo. Vatirhi va sungurile ku ka va nga holi ku ringanela tin’hweti ta ntsevu, leswi swi vangile swivutiso ehenhleni ka mali leyi humesiweke hi vatswari.

Vatirhi va sungurile ku toyatoya hi n’hweti ya Mawuwani, loko va ta byeriwa leswaku a ku na mali ya ku va hakela. “A hi vatirhela mfumo, hi lo tinyiketela ku tirhela xikolo, naswona mali leyi yi hlengiweke hi vatswari ahi fanekerile ku kuma xa n’wanchumu eka yona”, ku boxa mutirhi loyi a tirhelaka xikolo hi ku tinyiketela. Nhloko ya xikolo u vile a rhamba nhlengeletano laha a nga paluxa leswaku yena na vatirhikulobye va dyile mali.

Nandzu wu mangariwile eka tindzawulo leti ti faneleke tanihi Sekhete ya Ndzawulo ya Dyondzo eka Malamulele xikan’we na Ndzawulo ya Dyondzo ya Xifundzhantsongo xa Mopani laha swi nga va tsandza ku yi ahlula ku kondza va yi hundzisela eka Ndzawulo ya Dyondzo ya Xifundzhankulu xa Limpopo ePolokwane. Ku vikiwa leswaku van’wana va vaehleketeleriwa lava hoxeke xandla eka vukungndwana lebyi va kunguhatile ku xavisa tindlu ta vona, tanihiloko na vulavisisi byi ya emahlweni