Joyce Makgauta A Kandziyisa E
Hi Themba Chauke
Joyce Makgauta, xiyimbeleri xa vunanga bya vukhongeri kusuka emugangeni wa ka Mavalani, loyi a tivekaka swinene hi ku endla thonamete ya ntlango wa bolo ya milenge ya lembe na lembe na mitirho yo nyikela eka vaaki, u tilulamisela ku humesa EP yintshwa eka mavhiki lamataka leyi thyiweke God First Movement.
Joyce i khale a ri eka migingiriko ya vuyimbeleri, naswona i khale a miyerile, endzhaku ka loko a kandziyisile alibamu yakwe hi Sunguti 2016, u tekile nkarhi wo wisa ku endla phurojeke ya yena endzhaku ka ku tinghenelerisa eka ntlawa wa vuyimbeleri bya vukhongeri, leswi swi endleke leswaku a tikuma a ri ku gingirikeni swinene ku endla vunanga bya yena n’winyi.
Kasi sweswi, EP ya God First Movment yi kombisa ku vuyela ka yena hi ku hetiseka eka timhaka ta vuyimbeleri. “Vayingiseri va nga langutela ku ndzi vona swinene eka EP leyi, xikan’we na mipfumawulo yo hambana-hambana,” Wa hlamusela. “Vanhu va ndzi tiva hi vunanga byo dzunisa, kambe eka EP leyi ku na tinsimu ta xintu na to hatlisa nyana. Ndzi tshemba leswaku ku ta va na swin’wana swa un’wana na un’wana.”
“Ndzi tekile xiboho xo tinghenisa eka vuyimbeleri hikuva byi vulavula na mbilu ya mina,” u ya emahlweni. “Leyi hi yona ndlela leyi ndzi vulavulaka na Xikwembu. Ku vula ntiyiso, vuyimbeleri i vutshunguri bya mina. Loko ndzi twa ndzi ri ehansi, noti wa vunaga wu ta ndzi kuma. Loko ndzi tsakile, ndzi tsala risimu. Na loko ndzi hlangana na ntlhotlho, ndzi khandziya xiteji ndzi yimbelela risimu,” u ya emahlweni.
Hambileswi a tihlamuselaka tanihi munhu loyi a nga dzika hi ntumbuluko, Joyce u vula leswaku vunanga i xilotlela xa yena xo pfulekela vanhu. “I ndlela leyi ndzi hlanganaka na vanhu, naswona ndzi tshembhela eka nseketelo walowo. Vanghana votala lava va nga le kusuhi na mina xikan’we na ndyangu wa mina va tile evuton’wini bya mina hikokwalaho ka vunanga.”
Vanhu votala va tivile hi Joyce eka ntlawa wa vuyimbeleri wa Vukona Worship Explorers, lowu a wu ngheneleke hi lembe ra 2018, kambe rendzo ra yena ri sukela ekule a nga se nghenelela eka ntlawa lowu. “A ndzi se tshama ndzi yima ku endla vuyimbeleri,” wa hlamusela.
“Kambe kuva xirho xa ntlawa wa vuyimbeleri swi endla leswaku u tshamiseka hikuva swilo hinkwaswo swi lulamisiwa hi munhu loyi a fambisaka ntlawa. Ku vula ntiyiso, leswi swi endlile leswaku ndzi tshamiseka swinene. Ndza switiva leswaku a ndzi fanele ku huma ndzi ya tiyimela nakambe.”
Exikarhi ka tinsimu ta ntlhanu leti ti nga kona eka EP, ku na risimu rin’wana leri a vulaka leswaku ri teka xiave xa nkoka embilwini ya yena, ku nga “Ndzi Pfune (Reloaded)” leri i risimu leri ri endliweke hi vuntshwa kusuka eka risumu leri a ri tsaleke hi lembe ra 2014, lembe leri a ri hlamuselaka tanihi nguva yo oma swinene eka vutomi byakwe. Risimu leri i khokholo ra mina,” ku tsundzuka Joyce. “Ri tshamela ro ndzi vuyisela eka ntiyiso wa leswaku mpfuno wa mina wu ta wu huma eka Hosi, hambi swilo swi tika.”
Risimu rin’wana leri ri nga kahle swinene i “Masungulo Ya Vutlharhi,” risimu ra xintu leri ri hlohloteriweke hi Swivuriso 9:10. “Ra tsakisa na ku vulavula, kambe leswi ri vulaka swona swi dzikile,” wa kombisa. Ndzi pfumela leswaku vayingiseri lava va vulavulaka ririmi ra Xitsonga va ta twisisana na rona, kambe hungu i ra mani na mani.”
Tanihileswi a ha lulamiselaka ku simeka EP ya yena, Joyce u na switsundzuxo eka swin’wana swiyimbeleri leswi swa ha kasaka. U tiyisisile leswaku ku kandziyisa tinsimu swa tika swi tlhela swi lava mali na ku tinyiketela. “Mi nga pfumeleli sweswo ku mi tshikisa,” wa hlohlotela.
“Xilo xa nkoka hi leswaku u fanele kuva wena n’winyi. U nga tsekatseki, xikan’we na ku nyika vanhu xivangelo xa ntiyiso xo lava ku landzelela milorho ya wena.” Wa gimeta laha a vuleke leswaku hi God First Movement, a nga humelerisi ntsena tinsimu kambe u tiyisisa ku vitaniwa ka yena kuva kusuhi na Xikwembu hi vuyimbeleri.