PONANI MAKHUBELE A VUYELA EKA MASIPALA
Hi Themba Chauke
Ponani Makhubele u thoriwile ximfumo, tanihi mukhanselara we vuyimeri bya engetelo (PR) hi ku yimela vandla ra ActionSA eka masipala wa Giyani, laha a sunguleke ku tirha kusuka hi siku ra 11 Nyenyenyani 2026.
Makhubele u kombisile ku khensa eka vandla ra ActionSA ku va ri n’wi nyikile vutihlamuleri byo rhangela vaaki va le Giyani. “Ndzi rhandza ku khensa vandla ra ActionSA, ku va na ntshembho eka mina, hi ku ndzi thola ku ta tirha eka masipala tanihi mukhanselara wa PR,” ku vula yena.
U vule leswaku vandla ri tekile xiboho xo n’wi thola hi Hukuri 2025, na swona swilaveko hinkwaswo swi rhumeriwile eka masipala hi siku ra 04 N’wendzamhala 2025, leswaku swi ta tekeriwa enhlokweni. Hambiswiritano, ku vile na ku hlwela endzhaku ka loko masipala wu tsandzekile ku siva xivandla lexi hi nkarhi lowu a wu languteriwile.
“Masipala a wu landzelerisanga maendlelo yo ndzi tivisa eka huvo ka ha ri nkarhi, hambileswi a wu kumile matsalwa hi N’wendzamhala. Va tekile xiboho endzhaku ka ku nghenelela ka vandla, na loko vandla ri ta va ri endzerile masipala hi siku ra ti 28 Sunguti 2026, kasi hi ti 29 Sunguti, huvo yi tiyisisile ku pfuleka ka xivandla,” ku hlamusela Makhubele.
Ku ya hi yena, loko ku tiyisisiwa ku pfuleka ka xivandla, masiku ma 21 lama lavekaka a ma hundzile. U vurile leswaku mhaka leyi yi hatlisisiwile hi ntirhisano exikarhi ka vandla na khomixini yo tiyimela ya mihlawulo ya Afrika-Dzonga (IEC), tanihileswi vandla ri tshameke tin’hweti timbirhi ehandle ku muyimeri eka huvo ya masipala hikokwalaho ku ku hlwela.
“Sweswi ndzi nga tiyisisa ximfumo leswaku IEC yi hetisisile ku siviwa ka xivandla, na swona ndzi mukhanselara ximfumo eka masipala wa Giyani kusukela hi ti 11 Nyenyenyani 2026,” wa tiyisisa.
Ku thorhiwa ka Makhubele swi ta endzhaku ka ntwanao exikarhi ka vandla ra ActionSA na Forum for Service Delivery, lava twananeke hi Sunguti 2025, ku hlangana va tirha swin’we.
Tanihi xiphemu xa ntwanano, murhangeri wa Forum for Service Delivery, Dok Mbahare Kekana u thoriwile tanihi xandla xa puresidende wa ActionSA. Tanihileswi Forum for Service Delivery a yi ri na vuyimeri eka huvo ya masipala wa Giyani, ku tekiwile xiboho lembe leri hundzeke leswaku Makhubele u ta siva mukhanselara Petrus Mkhari. Ku thoriwa kakwe ku tirha eka huvo ya masipala wa Giyani swi vuye swi humelela, na swona u tivisiwile ximfumo eka ntshamo wa huvo wo hetelela.
Ehandle ko dya nkarhi, Makhubele u vule leswaku loko a ha yimerile ntirho wo hlambanyiwa ximfumo hi masipala, u vurile leswaku swi na nkoka ku titivisa eka vaaki va le Giyani. “Loko ndza ha yimerile masipala ku lulamisa ntirho wa xihlambanyo xa mina ximfumo, xikan’we na ku ndzi nyika xiyenge xa ntirho, ndzi vonile swi ri na nkoka ku titivisa eka vaaki leswaku va ta tihlanganisa na mina loko swi ta eka timhaka ta vukhorokeri bya vaaki.
Kasi ku thoriwa ka yena swi kombisa leswaku i ro sungula ActionSA yi kuma vuyimeri eka huvo ya masipala wa Giyani endzhaku ka ku cinca loku veke kona loko ku vile na ku hlangana ka mavandla. Makhubele a hi lontshwa eka swa tipolitiki. U tirhile eka ANC eka xifundzakulu, a nga se ya eka vandla ra MK, a suka eka MK, a tlhelela nkarhinyana eka ANC, laha a nga vona swi fana na ku luma nketani hi meno, kutani a suka a ya eka ActionSA.