TZANEEN UNITED YA HA RI ENYIMPINI YA XIDLODLO
Hi Themba Chauke
Tzaneen United yi vuyiserile ku tshembha ka leswaku yi nga ha heta nguva yi ri emaninginingini ya logo eka ligi ya ABC Motsepe xitirimu xa A, endzhaku ka ku hlula xipano xa Baduza Celtics hi 2-0 hi mehelo ya vhiki. Ku hlula ka xipano swi endla leswaku va dya swirhendze swa xipano xa varhangi va le mahlweni Mpheni Home Defenders, tanihileswi mphikizano wo lwela xiyimo xo sungula wu yaka emahlweni.
Hambileswi kuhlula loku ku nga hungutanga vangwa ra mikutlunya ya ntlhanu exikarhi ka Tzaneen United na Mpheni Home Defenders, leswi swi tlangile xiave xa nkoka ku sivela leswaku vangwa leri ri pfuleka swinene. Loko Tzaneen United a yi lo lahlekeriwa hi mikutlunya eka ntlangu lowu, a ku ta va ntirho lowukulu ku pfala vangwa leri pfuriweke hi varhangi va le mahlweni.
Enkarhini wa seswi, Tzaneen United yi na mikutlunya ya 29 endzhaku ka mitlangu ya 14, loko Mpheni Home Defenders yi khomelerile emaninginingini hi mikutlunya ya 34 endzhaku ka mitlangu leyi ringanaka. Loko ka ha sele mitlangu yo hlaya leyi faneleke ku tlangiwa nguva yi nga si fika emakumu, Tzaneen United yi ta va na ntshembho wo yisa emahlweni ntshikelelo eka varhangi na ku tirhisa nkarhi loko varhangi vo lahlekeriwa hi mikutlunya.
Loko swa ha ri tano, Mpheni Home Defenders na vona vu kumile mbuyelo wa nkoka hi mahelo ya vhiki, hi kuhlula xipano xa Nkowankowa Continental hi 1-0, eka ntlangu lowu a wu tika swinene. Ntlangu lowu a wu tikomba wu tika swinene eka varhangi ku tlula leswi a wu languteriwile xiswona, tanihileswi Nkowankowa Continental yi ngheneke eka ntlangu lowu yi ri na ku titshembha na swona a yi languteriwile ku hlula ro sungula eka nguva leyi.
Nkowankowa Continental yi hlanganile na nguva yo tika kusukela loko nguva yi sungurile hikuva a va si hlula ni ntlangu ni wun’we. Leswi swi endla leswaku xipano xi va etshakwini ra logo. Xipano xi na mikutlunya yinharhu ntsena ehenhla ka mitlangu ya 14, na swona mikutlunya leyi yi kumekile hi ku tlanga maringa, xikan’we na ku hluriwa eka mitlangu ya 11.
Xiyimo lexi xo tika xi tisa ntshikelelo eka vadzaberi va xipano, ngopfu-ngopfu mudzaberinkulu, loyi a nga le ka ntshikelelo wo cinca xiyimo. Xipano a xi languteriwile ku hlula eka ntlangu wa mahelo ya vhiki kambe ka ha kokiwa exilogweni.
Ehandle ko tinyiketela, Nkowankowa Continental, yi tikumile yi hlanganile na varhangi eka logo, Mpheni Home Defenders, xipano lexi na xona xi tiyimiseleke ku kuma mikutlunya hinkwayo. Kuhlula ka Mpheni a swi ri na nkoka swinene ku nga ri ku ya emahlweni le maninginingini, kambe na ku sivela xipano xa Tzaneen United ku pfala vangwa.
Eka yin’wana mitlangu, Selwane White Vultures yi antswisile xiyimo xa yona eka logo endzhaku ka ku hlula xipano xa Dolphins 1-0. Mbuyelo wu vonile xipano xi tlakuka kusuka eka 14 ku ya eka 17 wa mikutlunya, xi suka eka xiyimo xa vunkaye ku ya eka xa vunkombo. Leswi swi endla leswaku xi ringana hi mikutlunya na xipano xa Baduzah Celtis, lava nga le ka xiyimo xa vutsevu kambe va hambanyisiwa hi tigolo.
Kasi Vondwe XI Bulltes, yi hlurile Tshakuma Tsha Madzivandila hi 2-1, loko Labash Academy yi hluriwile hi Mukondeni Young Chiefs hi 1-0.