MUDZABERI U KOMBELA MPFUNO

Hi Themba Chauke

Siphokazi Mpofu, un’wana wa vadzaberi va xipano xa netball xa Queens, lexi hluleke eka mphikizano wa Khaphu ya Meyara wa Giyani lembe leri hundzeke, u hlawuriwile kuya hlangana na xipano xa vadzaberi lava nga ta yimela xifundzantsongo xa Vhembe eka mphikizano wa Telkom Netball Championship (TNC)

Thonamete leyi ya tiko hinkwaro, yi languteriwa ku endleriwa eBoksburg, exifundzenikulu xa Gauteng, kusuka hi ti 5 ku fika 10 Mawuwani 2026. Laha ku hlanganaka vantshwa va vuswikoti bya le henhla eka ntlangu wa netball etikweni hinkwaro leswaku vadzaberi na vatlangi va kuma nkateko wo vonakarisa vuswikoti bya vona etikweni.

Loko a vulavula hi ku hlawuriwa ka yena, Mpofu u kombisile ku tsaka swinene na ku khensa nkateko. “Leswi swi vula swo tala eka mina hikuva swi vula leswaku ndza kula eka migingiriko ya netball,” ku vula yena. “Ndzi rhandza ku khensa nhlangano wa ntlangu wa netball eVhembe hi ku ndzi nyika nkateko lowu, ndzi langutela ku tirhisa nkarhi lowu hi ku hetiseka.”

Hambileswi a nga taleriwa hi nyanyuko, Mpofu u langutanile na mitlhontlho ya swa timali. Nhlangano a wu seketeli hi swa timali eka vadzaberi lava hlawuriweke, leswi katsaka mafambelo na byetlelo. Loko ka ha ri na nxavo wa le henhla wa mafura rendzo ro famba hi gondzo kusuka eLimpopo kuya eGauteng ra vitana swinene.

“Hikokwalaho ka leswi, ndzi fanele ku hlengeleta mali ku fikelela swo famba, byetlelo, swakudya na swin’wana swilaveko leswi fambelanaka hi ndzexe,” wa hlamusela. “Hikwalaho ndzi kombelaka nseketelo wa swa timali kusuka eka un’wana na un’wana loyi a nga pfunaka,” u ya emahlweni.

  Kuya hi Mpofu, u amukela mpfuno wun’wana na wun’wana a nga languti mpimo. U kunguhata ku engetela mali leyi a nga ta nyikeriwa leswaku yi fika eka R3,500, leyi a tshembhaka leswaku yi ta ringana ku fikelela swilaveko hinkwaswo swa yena hi nkarhi wa thonamete leyi.

Hambiswiritano, mitlhontlho ya swa timali a yi heli hi Mawuwani. Mpofu u tlhela a kombisa leswaku ku nga se hela n’hweti endzhaku ka thonamete ya netball, u ta va a kongoma eCape Town hi Mhawuri laha a nga ta famba na xipano xa netball xa vatlangi va malembe ya le hansi ka 21 na xa lavakulu, na swona eka rendzo leri u fanele ku hlengeleta R6,500.

“Mi nga swi vona leswaku ku teka mali ya muxaka lowu kusuka eka mali ya mina ya n’hweti na n’hweti a swi olovi, hi swona leswi endlaka leswaku ndzi kombela mpfuno eka munhu un’wana na un’wana la nga kotaka ku tshambuluta xandla a ndzi pfuna leswaku ndzi pfuna vana lava ndzi va rhangelaka.”

Ku tinyiketela ka mpofu eka ku hluvukisa vuswikoti bya vantshwa eka ntlangu wa netball swi le rivaleni, kambe ehandle ka mpfuno wa swa timali, vuswokoti bya yena ku nghenelela eka tithonamete ta nkoka etikweni a swi se va rivaleni. U kombela van’wamabindzu, vaaki na varhandzi va netball ku pfuna.

Lava nga kotaka ku pfuna va nga tihlanganisa na Siphokazi Mpofu eka 083 486 3146.