ATLETICO YI WA

Hi Themba Chauke

Ku fana ni mbewu leyi bolaka hikwalaho ka nkayivelo ka swakudya swa misava na maxelo yo biha, ku vile na ku khomiwa hi tingana eka ntlangu wa bolo ya milenge ya va xisati eka thonamete ya Khapu ya Meyara wa Giyani ya 2026, eka ntlangu lowu a wu tlangiwa hi mugqivela. Leswi swi ta endzhaku ka loko xipano xa le ka wadi 18 ku suka emugangeni wa le ka Gawula xi hlurile xipano lexi xi nga tlanga tifayinali lembe leri hundzeke xa wadi 13, Atletico hi 2-0 eka rhengu ro sungula ra mphikizano.

Mbuyelo lowu wu rhumerile rungula ra swihlamariso eka thonamete, tanihileswi Atletico yi tekiwaka tanihi xin’wana xa swipano swa matimba eka mphikizano wa va xisati. Swi endla malembe yo hlaya xipano lexi kumekaka elokixini ra ti-F eGiyani, xi ri ku ntlhontlheni ka xiyimo xa le henhla laha xi tiakeleke vito eka swipano swo tlanga kahle.

Lembe leri hundzeke, Atletico FC a yi ri kusuhi swinene na ku tlakula khapu loko yi ta hluriwa hi tipenaliti eka ntlangu wa tifayinali. Xipano xi fambile na R39 000 tanihi xipano lexi nga hluriwa eka tifayinali, na swona se a xi tlhomile tihlo eka khaphu leyi lembe leri.

Hi ku tiyimisela ku papalata leswi humeleleke lembe leri hundzeke, vatlangi va antswisile migingiriko ya vona ya vutiolori ku lulamisela thonamete leyi. Mudzaberi wa xipano Hlawu Ndlovu, u vulavurile hi thonamete leyi yi nga si sungula a vula leswaku xipano xi tirhile hi matimba ku lulamisa leswi endleke leswaku xi hluleka ku teka xidlodlo lembe leri hundzeke. “Hi endlile vutiolori hi ku tiyimisela ku papalata swihoxo leswi hi swi endleke lembe leri hundzeke, leswi endleke leswaku hi lahlekeriwa hi ntlangu wa tifayinali,” ku vula Ndlovu hi nkarhi lowu a va tilulamisela ku ya tlanga eka mphikizano wa lembe leri.

Hambiswiritano, makungu hinkwawo ya Atletico ya dzudzekile ku fana ni mberha eka ntlangu wa vona wo sungula. Wadi 18 yi fikile yi ri na makungu ya le rivaleni eka ntlangu lowu lama va ma tirhiseke hi ku hetiseka kusukela loko mpepe yi ba. Endzhaku ka ku hlaya xipano lexi a va phikizana na xona, va vonile mutlangi wa le mahlweni wa Atletico, loyi a tivekaka hi vito ra “Big Mama,” loyi a ku ri mutlangi loyi a va vona a fanele ku tsemiwa tipiko.

Eka ntlangu hinkwawo, Wadi 18 a yi rhumela vasirheleri vambirhi ku langutana na yena loko a khomile bolo, loko van’wana vatlangi va seketela loko a ringeta ku phunyuka. Leswi swi endlile leswaku Big Mama a tsandzeka ku lawula ntlangu na swona a aleriwa ku kuma xiphemu xo tumbuluxa mikateko yo howisa. Matlangelo lawa ya kavanyetile nkhuluko wo hlasela wa Atletico, leswi endleke leswaku va tirhisa tibolo to leha na ku hlasela laha na lahaya, leswi a swi kavanyetiwa hi ku olova hi vatlangi va le ndzhaku va wadi 18.

Loko xipano xa Atletico xi tshembherile swinene eka nxungeto wo hlasela, Wadi 18 a yi kombisa matlangelo ya kahle erivaleni. Vatlangi vo hlaya va xipano a va nyokovela va hundza vatlangi va le ndzhaku, laha va koteke ku boxeketa eka xiphemu xa vumbirhi. Wadi 18 yi howisile kambirhi endzhaku ko vuya eku wiseni laha va nga hlula xipano xa xirhandzwa eka thonamete xi ya hlantswa jesi.

Matlangelo ma kahle ma Wadi 18, a ma va yisanga ntsena eka swipano swa 16, kambe na ku va tivisa tanihi valweri va ntiyiso va xidlodlo xa lembe eka leri. Tanihileswi se ku humeke xipano xa matimba, thonamete yi pfula tinyangwa eka swipano swin’wana ku lwela xidlodlo lexi eka mitlangu leyi landzelaka.

Kasi eka bolo ya va xinuna na kona ku vile na swihlamariso endzhaku ka loko xipano xa le ka Wadi 11 leyi katsaka lokixi ra ti-E na ti-F, xi hluriwile hi xipano xa le ka Wadi 5 xa ka Nkuri hi tipenaliti 6-5.Eka Netball Vipers ya le ka Wadi 11 yi hlurile Wadi 5 hi 18-2 eka ntlangu lowu a wu tlangiwa hi Sonto