WADI 10 NA 18 TI TA OMBANA

Hi Themba Chauke

Xipano xa bolo ya milenge xa wadi 10, lexi tivekaka hi vito ra Masipala, xi ya hlangana na xipano xa wadi 18 eka ntlangu wa tisemi-fayinali eka khaphu ya meyara erivaleni ra mitlangu ra Giyani hi ti 22 Mhawuri 2026, laha khale ka tinghwazi ti tshembhaka leswaku ti ta yisa emahlweni matlangelo ya tona ya kahle ku vuyisa xidlodlo.

Masipala va humelerile tanihi xin’wana xa swipano leswi tlhomiweke tihlo eka mphikizano wa lembe leri endzhaku ka matlangelo yo tiyisa nhlana eka mitlangu yo sungula. Ku ta va ku nga ri ro sungula ku va xipano xa wadi 10 xi fika eka rhengu leri eka khapu ya meyara.

Loko hi nga si fika eka 2017, xipano xa masipala a xi wela eka swipano leswi a swi lawula eka mphikizano, laha a xi tshamela ro tlakula khapu na ku tiveka eka xiyimo xa ku va tinghwazi ta ntlangu wa bolo ya milenge eGiyani.

Swi na malembe yo hlaya xipano xi tekiwa tanihi xipano lexi a swi tika ku xi hlula ku fika laha swi nga xaxisiwa hi swipano swintshwa.

Ku suka kwalaho, Masipala a yi tikeriwa ku hlula ku fana na malembe yo hlaya laha a yi tiphina hi ku hlula, Leswi swi tlhele swi vonakala na le ka lembe leri hundzeke loko xipano xi ta humesiwa ta ha suka, hi xipano lexi heteleleke xi teka xidlodlo xa mphikizano.

Hambiswiritano, mphikizano wa lembe leri wu nyikile vaseketeri va wadi 10 ntshembho lowu pfuxeleriweke wa leswaku swi nga ha endleka leswaku masipala yi ri kusuhi swinene na ku tlhelela eka masiku yo hlula. Matlangelo ya vona ya kahle eka thonamete ya lembe leri ya kombisile ku hlasela hi ku titshembha na ku tiyimisela, leswi kombisaka leswaku xipano xi lulamerile ku ntlhontlha xidlodlo xa khapu ya meyara.

Ku hlula ka vona hi ndlela leyi khomekaka eka ntlangu lowu hundzeke na ku fikelela tisemi-fayinali swi rhumela hungu eka swipano leswi nga sala ra leswaku Masipala a yi fanelanga ku tekeriwa ehansi.

Ntlangu wa vona na xipano xa wadi 18 wu ta kombisa swikambelwana swa matimba eka wadi 10, loko va tlhomile tihlo kuya eka tifayinali.

Loko va ha tlhomile tihlo eka tifayinali, Masipala yi fanele ku hlasela hi matimba, matikhomelo ya kahle, na ku titshembha leswi a va tlangisa xiswona eka mitlangu leyi nga hundza. Eka vaseketeri va xipano, tisemi-fayinali ti na nkoka swinene ku tlula ntlangu hi woxe. I nkateko eka xipano lexi nga na matimu ya kahle eka mphikizano ku tiyisisa leswaku masiku ya kahle a ma se fika emakumu.

Loko swipano leswimbirhi swa ha tilulamisela kuya hlangana erivaleni ra mitlangu ra Giyani, mahlo ya ta va ya langutile xipano xa masipala loko xi ta swi kota ku hundzela emahlweni, ku vuyisa xiyimo xa xona tanihi xin’wana xa swipano swa matimba eka khapu ya meyara wa masipala wa Giyani. Kasi xipano xa wadi 18 xi ta va ehansi ka ntshikelelo loko xi ya hlangana na xin’wana xa swipano swa matimba eka thonamete.