TINHENHAKAZI TI NGA HLANGANA EKA TIFAYINALI
Hi Themba Chauke
Xipano xa netball xa wadi 11 lexi tivekaka hi Vipers, xi nga ha va na nkateko wo ya susana nkani na xipano xa Queens xa wadi 13, eka tifayinali ta khapu ya meyara, loko swipano haswimbirhi swo kota ku hlula eka mitlangu ya tisemi-fayinali hi Mugqivela.
Swipano leswimbirhi swi papalatanile eka mitlangu ya tisemi-fayinali, leswi nga endlaka leswaku swi hlangana eka tifayinali leti languteriweke hi mahlongati. Loko swipano leswi a swi lo hlangana eka rhengu leri landzelaka, xin’we xa swona a xi ta boheka ku humesiwa xi nga si fika eka tifayinali.
Tifayinali ta Vipers na Queens ti koka rinoko swinene hikwalaho ka leswi humeleleke eka mphikizano wa lembe leri hundzeke. Queens yi hlurile Vipers eka tisemi-fayinali ta lembe leri hundzeke eka khapu ya meyara, leswi heriseke vulawuri bya nkarhi wo leha bya xipano xa ward 11 eka thonamete leyi.
Loko Vipers yo kota ku fikelela tifayinali ta lembe leri kuya hlangana na xipano xa Queens nakambe, va ta va na nkateko wo tirihisela eka ku hluriwa loku veke kona lembe leri hundzeke xikan’we na ku tibukutela khapu. Hambiswiritano, xipano xa Queens, xi ta va xi lwela ku sirhelela xidlodlo xa xona. Tanihi vasirheleri va xidlodlo, va ta va va tiyimiserile ku sirhelela xidlodlo xa vona ku kombisa leswaku ku hlula ka vona ehenhla ka xipano xa Vipers lembe leri hundzeke a swi nga ri swa kan’we.
Swipano haswimbirhi swi tlangile kahle kusukela emasungulweni ya thonamete ya lembe leri, hi matlangelo yo lawula xikan’we na ku hlula hi ndlela leyi khorwisaka. Matlangelo ya vona yo hlasela na vuswikoti byo hlula mitlangu hi ku olova swi endla leswaku ku va vona lava tekiwaka tanihi valweri va ntiyiso eka xidlodlo lexi.
Loko ku ri Vipers, va na matimu yo leha tanihi vahluri va khapu ya meyara. Xipano xa wadi 11 xi lawurile mphikizano lowu ku hundza malembe ya khume loko vulawuri bya vona byi ya yimisiwa hi xipano xa Queens lembe leri hundzeke.
Kasi matimu ma ta tlhela ma engetela nhlohletelo eka Vipers, loko va ringeta ku teka xidlodlo lexi nakambe. Ku vuya ka vona eka tifayinali va tlanga na Queens, swi nga va nyika nkateko wa leswaku va tlhela va vuyela eka xiyimo xa vona xo lawula mphikizano.
Hambiswiritano, Queens yi kombisile leswaku va nga kota ku khoma ntshikelelo loko va hlangana na swipano swo tika, na swona va nga ha tlhela va kuma mbuyelo wa lembe leri hundzeke loko swipano leswimbirhi swi ya hlangana nakambe.
Tifayinali exikarhi ka Vipers na Queens, ti nga endla leswaku swipano leswi swi tshamela ro phikizana ku tisa nyanyulo eka khapu ya meyara.
Kambe vaseketeri va nga hlongorisi huku va khome munyu hikuva swipano leswi loko swi fanele kuya hlangana, swi fanele ku hlula eka mitlangu ya tisemi-fayinali hi Mugqivela, hi kona ku nga ta lulamisiwa xiteji xa ntlangu wa netball lowu languteriweke hi mahlongati eka tifayinali.