TIFAYINALI TA TINHENHAKAZI TI TIYISISIWILE

 Hi Themba Chauke

Xipano xa netball xa le wadi 12, lexi tivekaka tanihi Vipers, xi kombisile matlangelo ya vulawuri hi Mugqivela endzhaku ka ku hlula xipano xa Wadi 9, hi mikutlunya ya 17-7 eka ntlangu wa tisemi-fayinali lowu a wu voyamela etlhelo rin’we ku fikelela eka tifayinali.

Vipers yi lawurile ntlangu ku suka emasungulweni, hi ku kombisa matlangelo yo hlasela xikan’we na vusirheleri lebyi a byi lulamisiwile kahle leswi siyeke Wadi 9 yi ri ku tikeriweni ku landzelela rivilo ra ntlangu. Ntshikelelo wa xipano wu endlile leswaku va rhanga emahlweni hi ku olova leswi endleke leswaku va lawula ntlangu ku fika emakumu.

Wadi 9 yi ringetile ku sivela mihlaselo ya Vipers, loko xipano xa le Wadi 12 xi ya emahlweni xi kuma mavangwa eka vatlangi va le ndzhaku va vaphikizani va vona laha va nga tirhisa mikateko ku kuma mikutlunya. Loko ntlangu wu fika emakumu, Vipers a yi rhangile emahlweni hi mikutlunya ya khume, leswi rhumelaka rungula ra vukarhi eka vaphikizani va vona eka ntlangu wa tifayinali.

Kasi hi hala tlhelo, xipano xa Queens, ku suka eka Wadi 13 na vona va tivekerile ndhawu eka tifayinali, leswi endlaka leswaku ku languteriwa ntlangu wo tsakisa wa swipano swo tiya eka netball. Enkarhini lowu hundzeke swipano leswimbirhi swi hlanganile eka tifayinali, laha Queens yi nga hlula Vipers ku herisa ku hlula ka vona eka mphikizano. Sweswi xiteji xi lulamisiwile eka ntlangu wa matimba, laha swipano haswimbirhi swi languteriweke ku kombisa vulawuri bya swona ku kota ku tlakula xidlodlo.

Ntlangu wa tifayinali wu languteriwa ku va wa matimba swinene xikan’we na ku tsakisa swinene, laha swipano haswimbirhi swi nga khoma to tala enkaveni wa rivala. Vipers yi languteriwa ku nghena eka ntlangu yi tiyimiserile ku kombisa leswaku tingwenya i va mani ehenhla ka Queens xikan’we na ku tirihisela eka ku hluriwa eka tifayinali ta lembe leri hundzeke. Hi ku siveriwa ku kuma xidlodlo hi Queens lembe leri hundzeke, Vipers yi ta va yi tiyimiserile ku cinca matafula enkarhini wa sweswi ku teka nakambe xiyimo xa le henhla.

Kasi Queens yi ta va yi lava ku kombisa leswaku ku hlula ka yona lembe leri hundzeke a ku nga ri matshopetani. Va ta va va tiyimiserile ku sirhelela xidlodlo xa vona na ku kuma nakambe xidlodlo xin’wana. Loko swipano leswimbirhi swa ha ri na mhaka leyi swi nga si yi gimeteka loko swi kongoma eka tifayinali, vaseketeri va nga langutela ntlangu wa matimba swinene loko swipano swi ya lwela xidlodlo lexi.

Swipano haswimbirhi swi kombisile matlangelo yo koka rinoko loko thonamete ya lembe leri yi sungula, hi ku kombisa matlangelo ya vulawuri eka mitlangu yo sungula. Mihlaselo ya swipano leswi xikan’we na vuswikoti byo hlula eka mitlangu hi mikutlunya yo olova swi va vekile eka xiyimo xa kahle tanihi valweri va xidlodlo lexi.
Vipers, ngopfungopfu, yi na matimu yo hlaya yo hlula eka Khapu ya Meyara. Wadi 12 yi lawurile mphikizano ku tlula malembe ya khume loko vulawuri bya vona byi fikisiwa emakumu hi Queens lembe leri hundzeke.

Leswi swi endla leswaku tifayinali ta lembe leri ti va na nyanyulo lowukulu wa mphikizano wa xiyimo xa le henhla ngopfungopfu eka swipano haswimbirhi. Loko xipano xa Vipers xi languteriwile ku tirihisela ku tlhela xi teka nakambe xidlodlo lexi, Queens yi langutgeriwa ku sirhelela xidlodlo lexi na ku kombisa leswaku i xipano lexi swi nga oloviki ku xi hlula.