Meyara Wa Giyani A Hlohlotela Ku Tiyisela eka Vatirhi Va Le Makaya

HI Orlando Chauke

GIYANI – Masipala wa Greater Giyani wu nsimekile Pfhumba wa Ntungu wa HIV, AIDS na TB lowu nga pfhumba hi ku tirhisana na ndzawulo ya rihanyo ya Xifundzhankulu xa Limpopo, Pfhumba lowu wu nsimekiwile emugangeni wa Mhlava Wellem, ku penda xifaniso lexi pfanganisiweke mayelana na ndlela leyi miganga yi langutaka vatirhi lava tshamaka emakaya ha yona.

Vunyingi bya lava va vulavuleke hi nkarhi wa xiendlakalo [ Event]  lexi va vule leswaku va chava leswaku vatirhi va le makaya va ta paluxa vuvabyi bya vona bya le xihundleni eka vaaki lava va rhendzeleke, naswona hikwalaho van’wana va va nga swi lavi ku pfumelela vatirhi va swa rihanyo emakaya ya vona.

“Mhaka hileswaku, loko se u byela mutirhi la tshamaka ekaya leswaku u karhatiwa hi leswi kumbe leswiya
vuvabyi, hi siku leri landzelaka u ta twa hi swona eka vanhu eswitarateni, naswona leswi hi swona swi endlaka leswaku swi va tano swi tika eka van’wana va hina ku va tshemba hi swihundla swa hina,” ku vule un’wana wa swirho swa vaaki Khensani Ngoveni hi nkarhi wa xiendlakalo.

Loko a hlamula swihehlo leswi, Cllr Cedrick Baloyi, nhloko ya swa Vupulani na Nhluvukiso wa Ikhonomi eGiyani loyi a nga va meyara wa nkarhinyana eka xiendlakalo lexi [ Event leyi], va hlohlotela vanhu ku va na ku tiyisela
eka vatirhi lava tshamaka ekaya, va vula leswaku i swa nkoka eku pfuneni ka vanhu ku hlayisa vutomi. Yena
u komberile mani na mani loyi swihundla swa yena swi paluxiweke hi vatirhi va le makaya ku vika mhangu leyi eka
valawuri lava faneleke.

“Ku na milawu leyi lawulaka vatirhi va swa rihanyo hinkwako etikweni, hikwalaho yo tano
swihehlo swi na vuswikoti byo endla leswaku vaendli va swiendlo va kombiwa rivati [Ku hlongoriwa]entirhweni loko ku kumiwa leswaku leswaku i ntiyiso,”

U hlamuserile hi ku kandziyisa nkoka wa vatirhi lava tshamaka ekaya eka vaaki. “A swi na mhaka
leswi u nga ha swi ehleketaka hi vona, lexi nga xa nkoka swinene hileswaku vanhu lava va ta ku ta pfuna
u hanya nkarhi wo leha eka vana va wena na ndyangu. Hikwalaho ndzi mi khutaza ku xixima sweswo, naswona mi amukela va pfule mavoko loko va endzela ekaya ra wena,” ku vula yena.

Xiendlakalo lexi a xi kongomisiwile ku pfuna vaaki hi ku twisisa ku antswa eka HIV, AIDS na TB
mintungu leyi ku vuriwaka leswaku yi dlaya vanhu hi ku nonoka etikweni. “Tanihi mfumo, hina ku
twisisa leswaku hambileswi hi nga na vutshunguri bya xiyimo xa le henhla etikweni eka leyi
mintungu, ha ha ri na ntlhontlho wo langutana na ku soriwa na xihlawuhlawu eka vanhu
lava va hanyaka na HIV na TB eka vaaki va hina,” a ya emahlweni

U byele vaaki leswaku HIV ya ha ri kona etikweni na leswaku, vanhu lava nga na yona va fanele ku ya emahlweni va nwa tiphilisi ta vona tani hi leswi va lerisiweke hi vatirhi va swa rihanyo leswaku vutomi bya vona a byi nga tsemiwi byi koma.