Xikolo Xi Nyikeriwa hi Tikhompyuta eka Masipala wa Collins chabane
Meyara wa Masipala wa Muganga wa Collins Chabane, Cllr Shadrack Maluleke, hi Mugqivela wa ti 2 Nyenyankulu 2024, u simekile ximfumu Amandla Computer Solar Lab exikolweni xa le henhla xa Mahuntsi emugangeni wa ka Xithlelani, ehandle nyana ka Malamulele.
Ndhawu leyi ya ‘Lab’ yi hlomisiwile hi 10 wa tikhompyuta ta ‘desktop’, 30 wa ti-laptop, xikanwe na vuhlanganisi bya Wi-Fi, leswi fungha nchumu wa nkoka eka nhluvukiso wa thekinoloji eka ndhawu leyi sweleke.
“Ku pfuriwa ka ‘Lab: leyi ya tikhompyuta i goza rin’wana eka minkarhi ya leswaku un’wana na un’wana a va na mfikelelo wa xidijitali, ku aka vaaki, na ku susumeta swivandlanene swa ikhonomi,” ku vula Meyara wa Collins chabane S.G Maluleke.
U kandziyisile xiave xa lab eka ku hlanganisa ku avana ka xidijitali, ku kurisa nhluvukiso wa vaaki, ku hlohlotela ku kula ka ikhonomi, na ku endla leswaku thekinoloji yi fikeleleka eka hinkwavo, hambi kuri ku nyika matimba eka miganga.
Nkhuvo lowu a wu ngheneleriwile hi vakhomaxiave va nkoka, ku katsa na Tatana Hasani Tlhabyayo, Hosi Makumeke, mukhanselara wa muganga, swirho swa Huvonkulu (Exco) ya Masipala, na vafambisi va xifundzantsongo xa Dyondzo.
Matshalatshala ya ntirhisano na nseketelo ku suka eka minhlangano ya laha kaya na ya matiko ya misava swi amukeriwile hi Meyara Maluleke, ku kandziyisa nkoka wa goza ra nhlanganelo eku hetisiseni ka migingiriko yo tano leyi nga na nkucetelo.
Lab leyi ya tikhompyuta leyi tirhisaka matimba ya dyambu yi yimela swo tala ku tlula ndhawu ntsena; i rivoni ra ntshembo eka swichudeni na vaaki va muganga wa ka Xithlelani.
Hi ku fikelela switirhisiwa swa khomphyuta ya manguva lawa na inthanete, swichudeni swi nga ndlandlamuxa ntokoto wa swona wo dyondza, swi kuma vuswikoti bya nkoka bya xidijitali, na ku lavisisa switirhisiwa swo hambana swa dyondzo.
Ku tlula kwalaho, vuhlanganisi bya Wi-Fi byi endla leswaku ku va na vuhlanganisi na ntirhisano lowu nga riku na swiphiqo, ku fambisa ku avelana vutivi na ku nghenelela ka vaaki.
Loko thekinoloji yi ya emahlweni yi hluvuka no nghena eka xiphemu xin’wana na xin’wana xa vutomi bya hina, migingiriko yo fana na Amandla Computer Solar Lab yi tlanga xiave xa nkoka eku tiyisiseni leswaku ku hava vaaki lava saleke endzhaku eka nguva ya xidijitali.
