Wanuna a Tovonakarisa Ekhoto hi Timhaka ta Migodi

Hi Themba Chauke

Vongani Mathebula wa malembe ya 35, a tivonakarisile xinkarhana emahlweni ka khoto ya Xifundzha ya Giyani, hi swihehlo swa ku cela migodi swi nga ri enawini xikan’we na ku tlula nawu wa vuhlapfa.

Wanuna loyi, u khomiwile endzhaku ka ku kumeka a ri na swicelwa swo hlawuleka. Ku khomiwa ka yena i xiphemu xa matshalatshala ya maphorisa yo herisa migingiriko yo cela migodi swi nga ri enawini eka xifundzhantsongo xa Mopani na le ka Xifundzheninkulu hi ku angarhela.

Muehleketeleriwa u khomiwile hi nkarhi wa pfhumba ra Vala Umgodi, leri endliweke etindhawini ta Giyani. Ku ya hi vuxokoxoko bya maphorisa, Mathebula u khomiwile endzhaku ka loko maphorisa ya lumiwile ndleve hi migingiriko ya migodi emugangeni wa ka Mapuve. Loko maphorisa va fika, va kumile mhunti yi fele etinyaweni, tanihileswi Mathebula a lo kololo hi nyuku hi nkari lowu a hluta swicelwa swo hlawuleka, laha ti nga rhosa xikan’we-kan’we.

Ku tlhele ku kumeka leswaku muehleketeleriwa u pfumala maphepha ya vutitivisi. Leswi swi endlile leswaku a hehliwa hi nandzu wo kumeka na swicelwa swo hlawuleka, xikan’we na ku tlula nawu wa vuhlapfa. Loko a khomiwa, maphorisa ya kumile switirhisiwa leswi a swi tirhisiwa ku endla migingiriko leyi.

Switirhisiwa leswi swi katsa saka ra swicelwa leswo hlawuleka, xikalu, rivoni ra le nhlokweni, michini yo hambana-hambana na tinsimbi to tsema hi tona. Loko a tivonakarisa ekhoto, Mathebula a nga vutisiwanga loko a tivona nandzu. Majisitarata u lerisile leswaku a tlheriseriwa exitokisini leswaku vulavisisi bya maphorisa byi ta ya emahlweni. Muehleketeleriwa u languteriwile ku tivonakarisa nakambe ekhoto hi siku ra 06 Khotavuxika 2025.