Vuhaxi Byi le Ngatini
Hi Tracy Novela
“Vuhaxi na vuhumelerisi bya mahungu hi leswi swi nga engatini ya mina naswona ndza tinyungubyisa hi swona," lawa i marito ya Muponisi Nghunyule wanuna loyi a tiakeleke vito eka timhaka ta vuhaxi bya vaaki. Nghunyule i wanuna loyi a nga velekiwa emugangeni wa ka Mapuve ehandlenyana ka doroba ra Giyani kwala xifundzheninkulu xa Limpopo.
Nghunyule u sungurile tidyondzo ta yena ta masungulo exikolweni xa le hansi xa Tlharihani, laha a nga yisa emahlweni tidyondzo ta yena exikolweni xa le henhla xa Chamandu. Nghunyule a nga gimetanga kwalaho, kambe u yile emahlweni a endla tidyondzo ta Vuhlanganisi eka Kholichi ya Capricorn. Kasi u endlile na tidyondzo ta
Vuhumelerisi bya Xiya-ni-moya na Revolution Media Academy laha a nga kuma ntokoto wa vuhaxi bya vaaki na yunivhesithi ya Wits.
“Ndzi tirhile eka swiyenge swo hambana-hambana leswi swi katsaka Citizen Justice Network laha a ndzi tirha eka xiyenge xa vunavetisi. Hi lembe ra 2010 ndzi tlhelerile eFemane (Bolobedu) ehansi ka Masipala wa Letaba laha a ndzi nghena kereke ya Assemblies of God Fellowship. Ndzi nghenelerile Eka swiyenge swo hambana-hambana swa vaaki laha a ndzi tirha ntirho wa mina wo sungula wa ku haxa eka xitichi xa Vuhaxi bya Vaaki xa Cosmo FM exivindzini xa doroba ra joni hi lembe ra 2015. Ndzi ringetile ku nghenela ekaswiyenge swo hambana-hambana swa xiya-ni-moya, kambe ndzi nga humeleli.
Ndzi kumile nkateko eka xiya-ni-moya xa Cosmo FM laha a ndzi haxa nongonoko wa Ndzhengha. Kasi eka lembe lerilandzelaka ndzi tirhile eka xitichi xa vuhaxi xa Tzaneen FM eka xiyenge xa mahungu laha ndzi nga va na nkateko wa ku va na mburisano na khale ka holobye wa hofisi ya puresidende wa tiko Jeff Hadebe hi nkarhi wa imbizo ya Masipala wa le Maruleng.
Ndzi tlhele ndzi tirha eka xitichi xa Vuhaxi xa Vaaki xa Sloot FM lexi nga ejoni laha a ndzi khomile minongonoko yo hambana-hambana leyi katsaka Mototo wa Afrika, xikanwe na xiyenge xa Mahungu laha ndzi nga hetelela ndzi ya tirha eka Xitichi xa Vaaki xa Vision FM laha a ndzi tirha eka xiyenge xa Mahungu, laha ndzi nga hetelela hi ku va mufambisi wa xitichi loko ndzi ta suka eka xitichi lexi.
Ndzi vile ndzi tshika migingiriko ya swa vuhaxi, kambe ndzi va na ku navela leswaku ndzi vuya nakambe eka timhaka ta vuhaxi. Leswi swi endlile leswaku ndzi sungula xitichi xa mina xa vuhaxi bya Podcast ndzi langutisisa swinene eka timhaka ta vukhongeri na tipolotiki. Eka podcast leyi, ku na nongonoko lowu vitaniwaka Scriptural Refill laha nongonoko lowu wu nga kongomisiwa eka vukhongeri laha ku nga na tihlokomhaka to hambana-hambana to hlohlotela hi rito ra xikwembu.
Mitlhotlho ndzi vile na yona eka swiyenge swo hambana-hambana ngopfu-ngopfu eka timhaka ta xiya-ni-moya laha a ku ri na swipimelo swa mahaxelo, kambe eka podcast a swi tano. Eka xiya-ni-moya a ku pfumaleka switirhisiwa na ku hlwela ka muholo. Vaaki va nga ha pfulela na ku yingisela xitichi xa mina xa podcast hi Ravunharhu na Sonto wun’wana na wun’wana hi awara ya nhungu ni madyambu. Vito ra xitichi xa podcast i Youth Wakeup Radio&@decatalyst eka Tik-tok
