DJ MUMBA A TLANGELA ALIBAMU YA YENA

Hi Pilot Manganyi

Qambhi leyi ndlandlamukaka eka vunanga bya Xitsonga leyi tivekaka tanihi DJ Mumba, u tiyisisile ku humesiwa ka alibamu ya yena ya ‘N’wa Mlambo’ hi nkhuvo wukulu. Nkhuvo wa ku tiyisisiwa ka alibamu ya DJ Mumba a wu khomeriwile Adan’wini Lifestyle Resort, emugangeni waka Makuleke hi ti 27, N’wendzamhala 2025. Nkhuvo lowu wu vile wun’wana wa mikhuvo leyi nga rivalekiki eka mikhuvo leyi khomiweke ya Xitsonga.

Ehandle ka sweswo, nkhuvo lowu wu endlile leswaku nguva ya khisimusi yi va yo antswa xikan’we no nyanyula eka vaaki loko yi pimanisiwa na tinguva leti hundzeke. Nkhuvo wu sungurile hi 10:00 nimixo ku kondza ri xa. Vanhu a va khitikanile kusuka eka timheho ta mune ta misava ku ta seketela nkhuvo wa DJ Mumba.

Mathikithi yo nghena ya xavisiwile ku kondza ya hela, na swona a ya sukela eka ntsengo wa R50 ku fikela eka R200. Vaseketeri a va tatile rivala ku pfumaleka na vuphelo bya marha, va endla nkhuvo wa DJ Mumba wu saseka ku hundza leswi a swi languterile. DJ Mumba u nyanyurile ntshungu hi tinghoma ta alibamu ya yena leyintshwa to ringana nkombo. Tinghoma leti ta kumeka eka Spotify, Apple Music, hambi ku ri eka YouTube.

Nkhuvo lowu wu katsile vukona bya tiqambhi tin’wana ta xiyimo xa le henhla, leti na tona ti nga nyanyula ntshungu hi vuswikoti bya tona. Tiqambhi leti a ti ri kona ti katsa Benny Mayengani, J John, Gondi Boy, Nano RSA, Dr Oumega, DJ Wisie na tin’wana to duma. Swiyenge swa mabulo a swo pfuma hi mikandziyiso ya le ka nkhuvo wa DJ Mumba. Vaseketeri va kombisile ku tsaka na ku tinyungubyisa hi nkhuvo lowu. “A ndzi nga swi langutelanga leswaku nkhuvo lowu ku nga va wa mahlori hi ndlela leyi”, ku boxa Chris Mashimbyi.

DJ Mumba u kombisile ku khensa eka nhlengeletano, xikan’we na vatirhikuloni lava a nga tirhisana na vona ku humelerisa nkhuvo wa ku tiyisisa alibamu ya yena. “Ndzi rhandza ku tata ku khensa eka matikhomelo na nseketelo wa vaseketeri, xikan’we na vatirhikuloni”. Leswi swi kombisile leswaku vaseketeri va na rirhandzu na nseketelo ehenhleni ka gondzo ra vuqambhi bya DJ Mumba. A ku tiyisisiwanga nchumu mayelana na ku endliwa ka nkhuvo wun’wana wa muxaka lowu, kambe nseketelo lowu a wu kumeke wu nga vula swin’wana eka nkarhi lowu taka. Nkhuvo wa DJ Mumba ku vile wona wu ri woxe wu nga xavisa mathikithi hinkwawo eka mikhuvo hinkwayo leyi nga va kona ya vunanga bya Xitsonga.