MUTLANGI LONTSONGO A HLUVULERIWA XIDLOKO

Hi Themba Chauke

Murisi Rikhotso, wa malembe ya 16, wo huma eGiyani a ti-F, u hlamarisile vo tala endzhaku ko tivisiwa tanIhi mutlangi wo antswa eka thonamete ya CSA, ya vanhwanyana va malembe ya le hansi ka 19, eka ligi ya Platinum leyi a yi khomeriwile eka xifundzakulu xa North West hi N’wendzamhala. Ehandle ka malembe yakwe lamantsongo, u hlawuriwile ku ya yimela swikolo swa Afrika-Dzonga, eka xipano xa rixaka xa malembe ya le hansi ka 19.

Ku ya hi mudzaberi wakwe, Dingani Mathonsi, wa Giyani Cricket Hub, Rikhotso a ha ku khoma malembe ya 16 hi nkarhi wa kona, naswona a languteriwile leswaku u ta tikeriwa, tanihileswi a phikizana eka xiyimo xa malembe ya le hansi ka 19, ku nga vanhu lavakulu xikan’we na ntokoto ku nga ri ntlawa wa malembe yakwe.

Hambiswiritano, ehandle ka leswi, u kombisile ku tiyimisela a tirha hi matimba. “A ndzi nga langutelanga leswaku u ta tisa ku cinca loku a ku endleke. A ndzi langutele leswaku ku vitaniwa ka yena swi ta n’wi aka eka miphikizano ya nkarhi lowu taka, loko a ta va a vupfile nyana xikan’we na ku kuma ntokoto,” ku hlamusela mudzaberi Mathonsi.

“Kambe leswi a swi endleke, swi tlula leswi a ndzi swi languterile, tanihileswi a nga hlawuriwanga tanihi muhoxi wo antswa ntsena, kambe a tlhela a hlawuriwa ku ya yimela swikolo swa khirikete swa Afrika-Dzonga, lexi ku nga xipano xa rixaka xa vanhwanyana va malembe ya le hansi ka 19, leswi swi n’wi vekaka eka xiyimo xa kahle xo ya hlawuriwa ku ya yimela xipano xa rixaka enkarhini lowu taka loko a ya emahlweni na matlangelo ya kahle,” ku vula yena.

Rendzo ra Rokhotso ri kombisa vuswikoti, ku tinyiketela, na ku tiyimisela, endzhaku ka ku rhandza ntlangu wa khirikete a ha ri ntsongo. Loko a sungula ku tlanga eka Giyani Cricket Hub, a tirha hi ku tiyimisela leswi a swi tsakisa vadzaberi na vatlangi kuloni hi vuswikoti bya yena na ku tiyimisela.

“A nga tali ku tlanga na titanga ta yena. Loko a ri na malembe ya 11, a tlanga na vana va malembe ya 16, leswi vulaka leswaku u tlurile xipano xa malembe ya 13, hi swona leswi endleke leswaku hi ehleketa ku ri a nge swi koti ku phikizana na vana va malembe ya le hansi ka 19,” u ya emahlweni.

Sweswi Rikhotso a nga xiphemu xa xipano xa vanhwanyana xa CSA, norho wakwe wo yimela tiko ra Afrika-Dzonga eka xiteji xa misava wu tikomba wu ri kusuhi na ku hundzuka ntiyiso. Ku nghenisiwa ka yena swi n’wi veka eka xiyimo xa kahle leswaku a nga ha yimela tiko ra Afrika-Dzonga eka mpikizano wa misava, ntsena loko a ya emahlweni a tirha kahle.

“Xikongomelo xa mina i ku ya tlangela xipano xa rixaka eka miphikizano ya misava. Ndzi lava ku yimela tiko ra Afrika-Dzonga hi ku nyungubya, ndzi phikizana na vatlangi vo antswa va misava, ndzi ya emahlweni ndzi lwela ndhawu ya mina eka xiteji xa misava,” wa hlamusela.

Eka Rikhotso, khirikete wu tlula ntlangu, i nkateko lowu a lavaka ku wu tirhisa ku cinca xiyimo xa vutomi na ku antswisa xiyimo xa le kaya. U vurile leswaku xiyimo xa le kaya enkarhini wa sweswi a xi olovi, na swona u vona nkateko wa ntlangu wa khirikete tanihi ndlela yo aka vumundzuku bya yena eka mitlangu. Mudzaberi wa xipano u vula leswaku hi minkarhi yo hlaya, va kombela vatswari va vatlangi kuloni ku pfuna Rikhotso hi switirhisiwa loko a huma tendzo to ya tlanga kun’wana leswaku a ta fana na van’wana vana.

Ends.