MPHENI YI PFULA VANGWA

Hi Themba Chauke

Xipano xa bolo ya milenge xa Mpheni Home Defenders, xi tekile goza ro rhanga emahlweni eka Ligi ya ABC Motsepe Xitirimu xa A, endzhaku ka ku hlula xipano lexi va phikizanaka na xona emaninginingini xa Tzaneen United, eka ntlangu lowu swipano a swi khomanile hi timhondzo erivaleni ra mitlangu ra Lulekani ePhalaborwa.

Ku hlula loku a ku lo nyika xipano mikutlunya yinharhu ntsena, kambe swi tlhele swi pfula vangwa ra mikutlunya ya ntlhanu, leswi tiseke gome eka Tzaneen United eka ku lwela xidlodlo lexi.

Mbuyelo a wu ri henhla loko ku kongomiwa eka ntlangu lowu, tanihileswi Tzaneen United a yi ri endzhaku ka Mpheni hi mikutlunya yimbirhi. Ku hlula a ku ta endla leswaku va hundza Mpheni hi kutlunya wun’we va rhanga emahlweni. Hambiswiritano, a ku ri xipano xa Mpheni lexi a xi tiyimiserile, hi ku kombisa vuswikoti na ku veka ntshikelelo eka xipano xa United.

Kusukela loko mpepe yi ba, a swi ri erivaleni leswaku swipano hinkwaswo swi lava ku hlula na swona a swi lavi ku lahlekeriwa. Ntlangu wu sungurile hi matimba, laha a ku ri na mphikizano wa matimba exikarhi ka rivala, ku ri tindlela to sirhelela leswaku va nga pfuli mavangwa endzhaku.

Mpheni a yi tiyimiserile ku sirhelela xiyimo xa yona emaninginingini, loko United yi tikomba yi ri na ndlala yo vutla ntlangu ku rhanga emahlweni. Swipano a swi va nga na mikateko yo vonakala eka xiphemu xo sungula, kambe matlangelo ya swipano haswimbirhi, a ya koka rinoko leswi a swi endla leswaku vaseketeri va yima hi swikunwana, leswi endleke leswaku swipano swi ya ekuwiseni hi 0-0.

Nkarhi wa xiboho wu tile hi xiphemu xa vumbirhi, loko Mpheni yi boxeketa hi le xikarhi ka vatlangi va le ndzhaku va United lava a va tilulamisile kahle, laha Mpheni yi nga nyokovela yi kuma golo leswaku yi rhanga emahlweni. Leswi swi tisile ku tlangela eka vaseketeri va Mpheni xikan’we na ku hefemula tanihileswi xipano xa vona xi rhangeke ku howisa. Vatlangi va Mpheni va kombisile ku vupfa tanihileswi a va nonokisa ntlangu hi nkarhi lowu xipano xa United a xi rhumela matlhari hinkwawo ku ringeta ku kuma golo yo ringanisa.

Loko ntlangu wu fika emakumu, xipano xa Mpheni xi yile maninginingini ya ligi hi 18 wa mikutlunya loko xipano xa United xi ri na 13. Eka wun’wana ntlangu, xipano xa Nkowankowa Continental lexi nga le tshakwini ra ligi leyi, xi kotile ku tsarisa kutlunya wo sungula endzhaku ko tlanga ku ringanahi 1-1 hi nkarhi lowu a xi endzerile xipano xa Tshakuma Tsha Madzivhandila.