MPHIKIZANO WA MAZHAKA

Hi Pilot Manganyi

Mazhaka Foundation yi siyile matimu yo ka ya nga rivaleki emugangeni wa ka Makahlule hikwalaho ka mphikizano wa yona wa lembe na lembe lowu a wu khomiwile kusukela hi ti 26 ku fikela ti 30 N’wendzamhala 2025, erivaleni ra mitlangu ra Mazhaka. Swipano leswi swi nga nghenelela swi vile swi ndlandlamuxiwa kusuka eka swipano swa 8 tanihi malembe lama nga hundza ku fikela eka 16 eka lembe ra 2025. Ndlandlamuko wa nkhuvo lowu wu hlanganisile vahlaleri vo hlaya, xikan’we na ku kombisa vuswikoti bya bolo ya milenge ehansi ka miganga ya doroba ra ka Malamulele.

Eka mphikizano lowu, a ku ngheniwa mahala na swona swipano a swi tlanga kusukela nimixo ku kondza nindzhenga. Swin’wana swa swipano leswi nga nghenelela swi katsa Mazhaka FC, Mabcity United, Mhinga Viaking FC, Magona United, Royal United, na swin’wana swo hlaya. Xikongomelo xa mphikizano a ku ri ku ndlandlamuxa vuswikoti bya vantshwa, ku hlanganisa rixaka, ku hlotana na tinyiko ta vatlangi, tanihileswi mphikizano a wu xiximiwile hi vukona bya vahloti va vatlangi, ku katsa na lava humaka eka NFD.

Xiyenge xa xiyimo xa le henhla xa vuhangalasa mahungu, Munghana Lonene FM xi vile xiphemu xa ntlangu lowu. Munghana Lonene yi tiserile vahlaleri vuhaxi bya ntlangu wo hetelela wa mphikizano exikarhi ka Mazhaka FC na Magona United. Vahlaleri va titwile va ri va nkoka swinene ku va va xiximiwa hi vukona bya xitichi xa Munghana Lonene tanihileswi a va nga swi langutelanga. “Mphikizano lowu i wa xiyimo xa le henhla, a ndzi nga tshembhi leswaku vukona bya Munghana Lonene byi nga hi endzela”, ku boxa muhlaleri wa ntlangu, Given Manganyi.

Ntlangu exikarhi ka Mazhaka FC na Magona FC wu vile wu chaya 0:0, leswi swi kondleterile swipano leswaku swi ya kombana vunhenha enkumeni. Magona United yi vile yi kota ku hlula Mazhaka FC enkumeni hi swikoro swa mune eka xin’we (4:1). Leswi swi tiyisisile leswaku Magona FC ku va xipano lexi xi nga humelela eka mphikizano wa Mazhaka foundation laha va nga teka xidlodlo, mali yo ringana R15 000, xikan’we na timendlele.

Magona FC yi kotile ku teka xidlodlo yi nga lahlekeriwanga na hi ntlangu na wun’we, tanihileswi yi nga sungula yi hlula Magomani All Zone hi 1-0, ku landzela Mafuyatha 0-1, ku tela Mabcity 0:0, kutani yi hlula Mabcity enkumeni, laha yi nga hetelela hi ku hlula Mazhaka eka ntlangu wo hetelela.

Mabcity United yi hetelerile eka xiyimo xa vunharhu, ku landzela Mazhaka eka xiyimo xa vumbirhi, kutani xipano xo sungula ku va Magona FC. Mutlangi loyi a va ka a tlangile ngopfu eka ntlangu wun’wana na wun’wana a nyikiwa ntsengo wo ringana R200. Mphikizano lowu ku vile wa xiyimo xa le henhla ehansi ka doroba ra ka Malamulele tanihileswi vaaki a va nyanyulekile. Emahetelelweni, mphikizano lowu wu pfariwile hi vukona bya swiyimbeleri swa ndhuma leswi a swi ri karhi swi nyanyula vahlaleri kusuka hi awara ya 10:00. Swiyimbeleri a swi katsa Benny Mayengani, Metrobeatz RSA, Master KG, J John, na swin’wana swo tala. Ku tiyisisiwile leswaku mphikizano lowu wa ha ta ya emahlweni wu khomiwa eka lembe ra 2026.