QHIVI YI HLULA XIDZEDZE
Hi Themba Chauke
Xipano xa bolo ya milenge xa Qhivi xi hlurile xipano xa Xidzedze 1-0, eka ntlangu lowu tlangiweke nakambe hikwalaho ko kavanyetiwa hi mpfula eka thonamete ya Shawela ya lembe na lembe, emugangeni wa le Shawela, ku nghena eka rhengu ra swipano swa 16 eka mphikizano.
Ntlangu lowu wu ta endzhaku ka loko ntlangu wo sungula exikarhi ka swipano leswi, laha Qhivi a yi ri endzhaku hi 2-1, wu tshikiwile hikwalaho ka mpfula ya matimba. Hi ku tiyimisela ku cinca xiyimo, Qhivi yi cincile vatlangi vo hlaya eka xipano xa vona eka ntlangu wa vumbirhi, laha a ku katsiwa na khale ka mutlangi wa Cape Town City Lefa Aphane, loyi a tivekaka swinene hi vito ra “Toy”
Aphane loyi a tlangela xipano xa ka ABC Motsepe, Baduzah Celtics, u humesiwile eka xipano vhiki leri hundzeke endzhaku ko tlangela xipano mavhiki ma nhungu. Ku fika ka yena na van’wana vatlangi lavantshwa, a swi languteriwile ku tisa vutshila na ntokoto lowu lavekaka ku hlula xipano xo tiya xa Xidzedze.
Ehandle ka ku cinca loku, xipano xa Xidzedze xi tekile vulawuri bya ntlangu kusukela loko ntlangu wu sungula. Na nkateko wo tlangela erivaleni ra le kaya, va tekile vulawuri bya ntlangu leswi endleke leswaku xipano xa vaendzi xi tshama xi ri eka xiphemu xa xona nkarhi wo hlaya wa ntlangu. Ku hlasela ka vona a swi ri erivaleni, tanihileswi a va hangalasa bolo hi xihatla, xikan’we na ku tshamela ro boxeketa vatlangi va le ndzhaku va Qhivi.
Vahlaleri va le kaya a va ya va taleriwa hi ntshembo loko ntlangu wu ya emahlweni, laha vahlaleri vo hlaya a va tshembha leswaku Xidzedze yi ta hlula ku ya eka rhengu leri landzelaka. Hambiswiritano, matlangelo ma vona a ma hundzukaka ku va swikoro. Nkarhi na nkarhi loko va endla mikateko leyi tshembhisaka a va hluleka ku howisa.
Kasi xipano xa Qhivi eka tlhelo lerin’wana, a xi tikhomile kahle, xi lehisa mbilu ku ringana nkarhi wo leha wa ntlangu. Xi rhwala ntshikelelo ku ringana nkarhi wo leha, va yimela nkarhi wa vona ku teka nkateko. Nkarhi lowu wu fikile evugimamusi bya ntlangu loko vatlangi va lendzhaku va Xidzedze va pfumelerile vaendzi ku tirhisa nkarhi lowu ku howisa golo xikoro xi va 1-0 ehenhla ka xipano xa le kaya.
Endzhaku ko rhanga emahlweni, xipano xa Qhivi xi gogile xi sirhelela xikoro. Va tiyisisile endzhaku na ku lawula ntlangu hi ku hetiseka, leswi hlundzukiseke vatlangi va Xidzedze, eka matshalatshala ya vona yo ringeta ku kuma golo yi ringanisa eka xiphemu xo hetelela xa ntlangu. Va sirhelerile ku kondza n’watipempe a ba nanga, ku gimeta ntlangu. Mbuyelo lowu wu vonile xipano xa Qhivi xi hundzela eka rhengu ra swipano swa 16 eka thonamete, laha va nga ta yisa migingiriko ya vona vhiki leri taka endzhaku ka ku gimetiwa ka rhengu ra swipano swa 32.
Kasi ku hluriwa ka Xidzedze swi vula leswaku xi humile ximfumo eka mphikizano wa thonamete ya R100 000, leswi a va tshembha leswaku va ta ya emahlweni endzhaku ka ntlangu lowu, ngopfungopfu endzhaku ka matlangelo ya vona ma kahle kambe lama nga tswalangiki mihandzu.