PFHUMBA RA N’WA KHAMBANI

Hi Pilot Manganyi

Nhlangano wa N’wa Khambani wu tivisile hi pfhumba ra “Future Queen” leri lulamiseriweke ku teka vundhawu hi n’hweti ya Mhawuri, laha va tiyimiseleke ku nyikela mathawula ya vaxisati eka swikolo swo ringana makume mbirhi ntlhanu (25) exifundzenikulu xa Limpopo. Pfhumba leri ri teka vundhawu hikokwalaho ka ku lava ku tiyisisa leswaku va xisati va ringanerile ku nghena xikolo ku nga ri na swirhalanganyi swa ku pfumala switirhisiwa loko va vona masiku.

Pfhumba leri ri tirhisana kun’we na nhlangano wa Lindiwe Pads, ku nga bindzu ra le matiko xikaya leri Lindiwe Nkuna kusuka emugangeni wa ka Thomo ku nga n’wini wa rona. Hi ku tirhisana na bindzu leri xavisaka switirhisiwa swa vavasati, pfhumba leri ri lava ku seketela van’wamabindzu va le matiko xikaya loko hi hala tlhelo va ri karhi va lwisana na swirhalanganyi swa loko vaxisati va vona masiku hi nkarhi wa tidyondzo.

N’wa Khambani, tanihi musunguri wa pfhumba leri u boxa leswaku; “a ku fanelanga ku va na n’wana wa nhwanyana loyi a nga yiki exikolweni hikokwalaho ka ku va a vona masiku.”

Ku tihlayisa ka vavasati loko va vona masiku i xirhalanganyi xin’wana lexi khumbhaka vavasati lava hanyaka ematiko xikaya, leswi endlaka leswaku va nga yi exikolweni, swi tlhela swi vanga ntshikelelo eka tidyondzo ta vona. Pfhumba ra “Future Queen” ri tiyimiserile ku nyikela switirhisiwa swa nkoka eka vavasati leswi swi nga ta pfuna ku hlayisa ku titshembha na xindzhuti xa vona.

Pfhumba leri ri ta tlhela ri tirhisana na tinqambhi ta le matiko xikaya, ku katsa Khanyi, Mis Lay, Ntsako Shirimani, Ntwanish, Nomi N’wa Penny na van’wana ku ndlandlamuxa vulemukisi hi swirhalanganyi leswi vavasati va langutaneke na swona na ku tlangela ku tlakusa vavasati.

Vaaki, van’wamabindzu na vanhu va amukelekile ku nyikela hi mathawula ya vaxisati kumbe ku seketela hi ku xava eka nhlangano wa Lindiwe Pads. Lava va tsakelaka ku nyikela na ku tiva vuxokoxoko hi xitalo va nga tihlanganisa na vurhangeri bya pfhumba, Vonani Mashila eka 0789841716.

Matshalatshala lawa ya kombisa ku ndlandlamuka ka mapfhumba ya vavasati lawa ya hlanganisaka nseketelo wa swa tidyondzo, ku ndlandlamuxa ikhonomi ematiko xikaya na vun’we.