KHAPU YA MEYARA YI HUNDZISERIWA EMAHLWENI

Hi Themba Chauke

Varhandzi va mitlangu eka masipala wa Giyani va sale va khomiwile hi tingana vhiki leri hundzeke endzhaku ka loko thonamete ya ndhuma ya Khapu ya Meyara yi hundziseriwile emahlweni ku pfula ndlela yo titsarisela ku hlawula leswi a swi endliwa hi siku ra 1 na 2 Mhawuri.

Thonamete leyi ya lembe na lembe, leyi nga na ntsengo wa R55 000 eka tinghwazi, hi yin’wana ya mitirho ya mitlangu leyikulu eka masipala, leyi kokaka rinoko eka magidigidi wa vahlaleri kuya erivaleni ra mitlangu ra Giyani. Yi tlhela yi va xiphemu xa nkoka eka vatlangi va le kaya va vuswikoti ku kombisa vuswikoti bya vona emahlweni ka vahloti va vatlangi ku suka eka swipano swa ka PSL.

Vaseketeri lava nga na ntolovelo wo ya hlengeletana erivaleni ra mitlangu hi mahelo ya vhiki ku ya hlalela ntlangu wa bolo ya milenge na netball, va fikile hi Mugqivela va languterile mitlangu hi xitalo, kambe va kuma leswaku mitlangu yi hundziseriwile emahlweni kuya eka mahelo ya vhiki leri landzelaka.

Ku hundziseriwa ka mitlangu a swi khomisanga varhandzi va mitlangu tingana ntsena, kambe na vaxavisi lava tshembhelaka eka thonamete leyi ku kuma mali. Un’wana wa vaxavisi u vule leswaku ku yimisiwa ka mitlangu swi vile na xiave lexi nga languteriwangiki. “Ndzi pfukile nimixo ndzi ri na makungu yo ya erivaleni ra mitlangu kuya xavisa swilo swa mina, kambe ndzi twa leswaku a ku na mitlangu hi mahelo ya vhiki leri,” ku vula muxavisi.

  Khapu ya Meyara yi kurile ku fika laha yi languteriwaka hi mahlo-ngati exifundzenintsongo xa Mopani, leswi kokaka rinoko ra vahlaleri vo hlaya etindhawini ta le Giyani na leti akelaneke. Ehandle ka ku tlakusa nhluvukiso wa mitlangu na vantshwa, thonamete yi tlhela yi tumbuluxa mikateko ya mabindzu eka vaxavisi va swakudya na van’wana van’waswimawusa lava tirhelaka erivaleni ra mitlangu.

Muvulavuleri wa masipala wa Giyani Steve Mavunda, u vule leswaku xiboho xo hundzisela mitlangu emahlweni xi tekiwile ku tiyisisa leswaku migingiriko yo titsarisela ku hlawula yi famba kahle ehandle ko kavanyetiwa.

U vule leswaku masipala wu twisisa ku khumbeka loku ku veke kona hikwalaho ko hundzisela mitlangu leyi emahlweni, kambe u tshembha leswaku xiboho lexi a xi fanerile ku seketela migingiriko ya nhlawulo. Khapu ya Meyara yi languteriwa kuya emahlweni hi mahelo ya vhiki leri taka, laha swipano swi lwelaka R55 000, ya ku va tinghwazi.

Kasi vahlaleri va languteriwa kuya tata rivala ra mitlangu ra Giyani hi mahelo ya vhiki tanihileswi thonamete yi yaka emahlweni yi tsakisa loko vatlangi va le kaya va kuma nkateko wo kombisa vuswikoti ku tsakisa vahloti va vatlangi.