PHORISA RI TIVONAKARISA EKHOTO

Hi Themba Chauke

Phorisa ra le Giyani, eka xiyimo xa vu warrant officer, ra malembe ya 60, a ri tivonakarisile emahlweni ka khoto ya majisitarata wa Giyani hi Ravumbirhi hi swihehlo swa vukungundzwana endzhaku ka ku khomiwa hi swirho swa Xiyenge xo Lwisana na Vukungundzwana xa Xifundzakulu xa Limpopo hi Musumbhunuko.

Muhehliwa loyi ku nga Mfundisi Benneth Kubayi, a tivonakarisile ekhoto endzhaku ka swihehlo swa leswaku hi Mawuwani 2020, u amukerile hakelo ku suka eka mumangari loyi a lava ku kuma layisense ya xihoko. Ku vuriwa leswaku Kubayi u tshembhisile ku pfuna hi migingiriko yo endla xikombelo xa layisense loko a hakeriwa mali yo karhi.

Hambiswiritano, endzhaku ka ku endla tihakelo, mumangari u kumile leswaku xikombelo xakwe a xi endliwanga hi ndlela leyi faneleke. Mhaka leyi yi vuye yi mangariwa emaphoriseni, kutani yi yisiwa eka xiyenge xo lwisana na vukungundzwana exifundzenikulu xa Limpopo ku endla vulavisisi.

Endzhaku ku gimeta ku endla vulavisisi, dokete ya nandzu yi rhumeriwile eka Mufambisinkulu wa Vuchuchisi bya Tiko (DPP), loyi a pfumeleke ku humesa xileriso xo khoma xa J50. Xileriso lexi xi endlile leswaku ku ya khomiwa muehleketeleriwa hi Musumbhunuko, laha a nga ya tivonakarisa emahlweni ka khoto ya majisitarata wa Giyani hi Ravumbirhi.

Loko a tivonakarisa ekhoto, muehleketeleriwa u nyikiwile beyili ya R5 000. Nandzu lowu wu hundziseriwile emahlweni kuya eka ti 28 Mhawuri leswaku a ta ya tivonakarisa ekhoto ya xifundza. Leswi swi va kona hikwalaho ka ntikelo wa swihehlo, leswi endleke leswaku nandzu lowu wu hundziseriwa ekhoto ya xifundza ku ya tengiwa kona.

Kasi khomixinara wa maphorisa ya xifundzakulu xa Limpopo, Mejara Jenerali Jan Scheepers, u amukerile ku khomiwa ka muehleketeleriwa xikan’we na ku tivonakarisa ka yena ekhoto laha a vuleke leswaku vukungundzwana a byi na vundhawu exiphoriseni xa tiko.

“Vukungundzwana byi yisa ehansi ntshembho eka voko ra nawu na swona hi ta tshama hi tiyimiserile ku tiyisisa leswaku swihehlo hinkwaswo swa vukungundzwana swi lavisisiwa hi ku hetiseka, na swona lava va voniwaka nandzu va fanele ku byara vutihlamuleri.