MILORHO YA MOPANI YI VA NKUMA

Hi Themba Chauke

Ku navela ka xifundzantsongo xa Mopani ku tlakusiwa kuya eka Ligi ya ABC Motsepe, swi fikile emakumu hi gome endzhaku ka loko xipano xa Nhlanhla Northern Bucks xi hluriwile hi xikoro xa le henhla eka Ligi ya Hollywoodsbets Limpopo, eka mitlangu leyi a yi khomeriwile eka Malamulele hi Sonto.
Xipano lexi xa le Giyani, a xi yimerile Mopani eka thonamete ya SAFA, laha a ku hlanganile tinghwazi ta tiligi ta ka vona, laha a va ya lwela ku tlakusiwa kuya eka Ligi ya Motsepe.

Northern Bucks yi nghenile eka ntlangu wa yona wo hetelela hi ku tlanga na xipano xa Phinnet City xo huma exifundzenintsongo xa Capricorn. Endzhaku ka ku kuma mikutlunya ya nkaye eka mitlangu leyi hundzeke, xipano xa le Giyani a xi lava ntsena ku tlanga ku ringana leswaku xi ta kota ku tlakusiwa na xipano xa ABC ku suka eVhembe, lexi se a xi hetile pfhumba hi mikutlunya ya 10.

Ku hlula ka xipano xa Northern Bucks, a swi ta endla leswaku ku va xona vahluri ehenhla ka swipano hinkwaswo hi mikutlunya ya 12. Hambiswiritano, ku navela ka xipano ku tlakusiwa swi cheriwile mati endzhaku ka ku hluriwa hi 4-0, hi Phinnet City ya le Capricorn, lexi sunguleke ntlangu na mikutlunya ya tsevu.

Xipano xa le Capricorn xi tlangile kahle ku kota ku teka mikutlunya yinharhu leswaku xi ya eka mikutlunya ya nkaye, xi ringana na Northern Bucks hi mikutlunya. Phinnet City yi kotile ku hundzela emahlweni hikwalaho ka swikoro swo hlaya, leswi heriseke ku navela ka xipano xa le Mopani ku tlakusiwa.

Ntlangu lowu wu kokile rinoko eka vahlaleri vo hlaya lava a va khitikanile kuya erivaleni ra mitlangu ra ka Malamulele, laha vahlaleri kusuka etindhawini to hambana-hambana ta xifundzakulu a va ri kona ku ya hlalela ntlangu lowu. Vaseketeri va le Mopani a va yile hi xitalo ku ya seketele Northern Bucks, va tshembha leswaku xipano xi ta gimeta hi mbuyelo wa kahle.

Hambiswiritano, xipano xa le Giyani xi tikeriwile ku phikizana na xipano xa Phinnet City lexi xi tirhiseke nkarhi wa mikateko leyi xi yi kumekeke ku lawula ntlangu. Loko swikoro swi karhi ku tlakuka swi vile erivaleni leswaku milorho ya Northern Bucks yo ya tlanga eka Ligi ya Motsepe eka nguva leyi taka se ya nyamalala.

Loko ntlangu wu fika emakumu a swi ri erivaleni leswaku vatlangi va Northern Bucks va karhatekile swinene endzhaku ka ku tsandzeka eka ntlangu lowu wo hetelela, loko vatlangi va Phinnet City va tlangela na vaseketeri hi nyanyuko lowukulu tanihileswi se a swi tiyisisiwile leswaku va ya tlanga eka ABC Motsepe eka nguva leyi taka. Hambileswi mbuyelo wu khomisaka tingana eka xipano xa le Mopani, matlangelo ya xipano eka thonamete ya kombisile vuswikoti bya vatlangi va bolo ya milenge eka xifundzantsongo.

Ku tsana ka xipano lexi a ku ri vatlangi va le ndzhaku, lava a va boxeketiwa ku olova hi xipano lexi a va tlanga na xona. Kasi na n’watipala na yena u hoxile xandla eka ku hluriwa ka vona tanihileswi a tshamela ro huma etshangeni ra yena ku ya tirha tanihi musirheleri wo engetela, leswi endleke leswaku swi koxa xipano tanihileswi swi endleke leswaku ku va na tigolo leti a ti papalateka.