MUNTSHWA A NGHENA EKA THEKINOLOJI

Hi Pilot Manganyi

Jaha ra malembe ya makume mbirhi mune (24) hi vukhale, Oscar Poco, ku suka emugangeni wa ka Makuleke, etindhawini ta ka Malamulele, ri tumbuluxile pulatifomo ya tiqingho leyi vitaniwaka “BuszBee”. Pulatifomo leyi yi tumbuluxeriwile ku ndlandlamuxa vuhlanganisi na ku olovisela vaaki lava tirhisaka swifambo swa mani na mani etindhawini ta vaaki.

Pulatifomo leyi yi ta endla leswaku vaaki va kuma marungula mayelana na mafambelo hi nkarhi, ku burisana ka vakhandziyi, ku vika leswi lahlekeke, ku avelana swilemukiso, ku tivisana hi ntlimbano wa le magondzweni, ku cinca ka magondzo na tinghozi. Ehandle ka ku voyamela eka switirhisiwa swo tanihi WhatsApp na vuhlanganisi byin’wana, vaaki va ta tirhisa Buszbee ku kuma swiviko hi mayelana na gondzo ra ka vona.

Eka nkarhi wa sweswi, Buszbee yi nyika vaaki mpfumelelo wa ku burisana, swiviko swa miganga, ku vika ku lahleka na ku kumeka ka tinhundzu na swiviko swa magondzo. Eka nkarhi lowutaka yi ta nyika vaaki mpfumelelo wa ku va va kota ku vona laha xifambo xa vona xi fikaka kona, ku buka mathikithi, mpfuneto wa thekinoloji ya AI na swiviko swa xihatla.

Xin’wana xa swihlawulekisi leswi pulatifomo leyi yi nga ta va na swona hi ku famba ka nkarhi i “Buszbee Cargo”. Xihlawulekisi lexi xi ta pfumelela vachayeri va swifambo ku rhwala mindhwalo ya lava va rhumeleke hi ntsengo wa le hansi. Leswi hi swin’wana leswi swi nga ta olovisa vutomi bya vaaki hi xiyimo xa le henhla.

Hi ku voyamela eka phurojeke leyi, Poco u boxile leswaku, “pulatifomo ya Buszbee kungevi xitirhisiwa lexi pfunaka vaaki ntsena, kambe ku ta va nchumu lowu nga ta endla leswaku milorho ya mina yi humelela tanihileswi ndzi swi laviseke xiswona ku sukela ndzi ri na malembe ya khume ntlhanu (15). Xin’wana xa nkoka ikuva sweswi ndzi ri karhi ndzi tiveka hikokwalaho ka van’wana vanhu, hikokwalaho, ndza khensa”.