SWIRHO SWA ANC SWI FANELE KU TIKHOMA KAHLE
Hi Themba Chauke
Meyara wa masipala wa Giyani Thandi Zitha u komberile swirho swa vandla ra ANC ku tikhoma kahle, ku titsongahata na nhlonipho loko vandla ra ha tilulamisela kuya eka nhlawulo wa miganga hi Hukuri 2026. Zitha a vulavula hi Sonto hi nkarhi lowu a teka xiphemu ekerekeni ya Revival Centre Synagogue emugangeni wa ka Dzingidzingi.
U kombisile leswaku matimu ya ANC ma le kusuhi swinene na vukhongeri xikan’we na tihosi. “ANC yi tumbuluxiwile hi lembe ra 1912 hi vafundhisi na tihosi, hikwalaho hi vona swi ri na nkoka ku tshunela kusuhi na vafundhisi ku kuma swikhongelo,” ku vula yena. U tlhele a vula leswaku hambileswi ANC yi nga tlanga xiphemu xa nkoka eka ntshunxeko wa tiko ra Afrika-Dzonga, swi tikomba ku ri na van’wana lava tekelaka vaaki ehansi.
“Masiku lawa vanhu va pfumala nhlonipho ku katsa na vana va hina a va hanyeki emakaya, leswi na hina hi swi pfumelelaka. A ka ha ri na nhlonipho etikerekeni, emitirhweni, na le makaya ya hina, kambe hi tivitana makhomuredi,” ku vula Zitha. U komberile swirho swa ANC ku tsundzuka ntikelo wa nhlangano loko wu sunguriwa, laha a nga vula leswaku makhomuredi ya ntiyiso ma titsongahata hambi ku ri eka vaaki lava nga le khombyeni.
Kuya hi Zitha, swirho swa vandla ra ANC, swi fanele ku pfuna vana lava xanisekaka hi ndlala ku nga ri ku va honisa, a vula leswaku khomuredi ra ntiyiso a ri nge hundzi n’wana la twaka ndlala ri nga n’wi pfuni. U tlhele a lemukisa varhangeri ku sukela ku tikukumuxa loko va hlawuriwile, laha a vuleke leswaku leswi a swi fambelani na vandla ra ANC. U nyikile xikombiso hi khale ka puresidende Nelson Mandela loko a endzela eGiyani a kombisa leswaku a ku ri munhu wo titsongahata no rhandza vana.
Kasi u tlhele a rhumela marito ya yena eka vatswari leswaku va fanele ku hlayisa vana va nga tirhisi timali ta vana ta mudende hi vusopfa.
“Xana u mhani wa njhani wo sukela vana va wena na va kokwa wa vona, wena u nyamalala? Loko u kurile huma xitandi mi tshika vadyuhari va dya mali ya vona ya mudende hi ku rhula,” ku tshinya Zitha.
U tlhele a kombisa mitlhontlho leyi yaka emahlweni ya vukalo bya mati etindhawini ta Giyani, laha a vuleke leswaku ku koka mati swi nga ri enawini hi swona leswi onhaka vumaki bya masipala, laha a nga nyika xikombiso hi muganga wa ka Hlaneki laha a tshamaka kona, a kombisa leswaku muganga lowu wu hava mati hambileswi wu akelaneke na damu ra N’wamanungu.
Loko a khumbha timhaka ta dyondzo u kombisile leswaku vatswari va fanele ku tirha swin’we na vadyondzisi loko vana va nga hanyi kahle eswikolweni, ku nga ri ku sola vadyondzisi. “Loko vadyondzisi va mi vitana exikolweni hi mhaka ya matikhomelo ya n’wana, mi vula leswaku vadyondzisi va venga vana va n’wina, loko n’wina mi honisa mahanyelo ya vana va n’wina,” ku vula yena. Zitha u gimetile hi ku vula leswaku dyondzo ya pfuna swinene eka vana ku hunguta vugevenga emigangeni.