WANUNA A LOVA ENAMBYENI
Hi Andrew Hlongwane
Wanuna wa malembe ya 61, u siyile vandyangu wa yena na maxaka va ri na gome.
Swivulavulo swi tshamile emilon’wini ya vaaki hambi ku ri swivutiso eka vandyangu wa ka Mashaba loko n’wini wa muti a fambile nampundzu hi xikanyakanya xa yena a ya masin’wini tanihi loko a ri phexenini kambe u tsandzekile ku vuya ekaya ku fikela mune wa masiku.
Loko vandyangu wa Antony Mashaba, 61, eNkomanini kusuhi na le Nkowankowa ehandlenyana ka doroba ra Tzaneen va vona dyambu ri pela kambe Antony a nga vonaki va tekile goza ro landza munghana wa yena tatana Tivane.
Ku vuriwa leswaku Tivane a nga vangi na nhlamulo yo khomeka loko a va hlamusela leswaku u ehleketelela leswaku Antony u dyiwile hi mati loko a ringeta ku tsemakanya nambu wa Ritavi.
Pfumba ro lavana na yena ri sunguriwile hi Ravunharhu nampundzu laha vaakatiko, vavalangi xikan’we na maphorisa ya xitichi xa Ritavi a va khomanile kuya seketela vandyangu wa ka Mashaba hi ku nghena hi makhwati na swikhwatana, kambe a ku va nga na nhlanga yo baleka ngati.
Va tlhele wa sungurisa hi Ravumune laha va nga tlhelela ekaya ximandlamandla.
Kambe hi ku pfunana na maphorisa ku rhambiwile maphorisa yo hlambela hi Ravuntlhanu laha va nga sungula ku nghena ematini ya nambu wa Ritavi kwalomu ka awara ya khume n’we kambe hi awara ya khume mbiri ntsumbu wa Antony Mashaba, 61, a wu humesiwa enambyeni leswi vulaka leswaku ntsumbu wa Mashaba wu kumiwile endzhaku ka masiku ya mune.
Makhanani Mashaba a nga makwavo wa mufi u hlamuserile leswaku hambileswi nkosi wu nga khensiwiki kambe vandyangu wa ka Mashaba va rhandza ku khensa loko ntsumbu wa Antony wu kumiwile. “Antony a ku nga ri munhu wa timholovo hambi vanghana a ku nga ri munhu wa swona. Kambe rifu ri hi tsavulele yena hi nga ehleketanga. Vana, vatukulu hambi ku ri mina a ndza ha langutele swotala eka Antony”, ku vula Makhanani.
Tatana Mahati na yena u tlhele a kandziyela kwala ka marito ya Makhanani. “Loko hi vulavula kumbe ku kombisa hi munhu wo lungha kumbe ku tiva timhaka ta yena a hi ta kombisa hi Tatana Mashaba. Mashaba u hi siyile hi nga ehleketanga na gome lerikulu. Xilondza lexi hi nga na xona hi ku loveriwa hi nuna loyi a xi twisiseki”, ku vula Mahati. Mashaba u tirhile malembe yo hlaya swinene eka purasi ra Snyman ematlhelo ya VenBerck kwalomu ka khume wa tikilomitara ku huma edorobeni ra Tzaneen. Maphorisa ya ha ri ka pfhumba ro lavisisa leswaku ku humelele yini.