KU KHUMBHEKA KA VAAKI HI VUKHAMBA

Hi Pilot Manganyi

Vaaki va muganga wa ka Shikundu, ehandlenyana ka doroba ra ka Malamulele, ehansi ka masipala wa Collins Chabane, va kombisa ku vilela na ku khumbheka hi tlhelo ra ntlakuko wa vukhamba lebyi tekaka vundhawu nkarhi na nkarhi.

Kuya hi swiviko, mindyangu yo hlaya yi ngheneriwile hi makhamba, laha ku hehliwaka leswaku va nghena hi ku gwavula mavanti na mafasitere. Ku vikiwa leswaku migingiriko ya mukhuva lowu yi teka vundhawu na vusiku kumbe hi mahlambandlopfu loko vaaki va ha khudzeherile kumbe va nga ri kona. Ku boxiwa leswaku makhamba ya phangha switirhisiwa swa nkoka swo tanihi tinqingo, mali, switirhisiwa swa gezi, na swin’wana swa switirhisiwa swa nkoka swa le ndlwini.

Un’wana wa vaaki va muganga wa ka Shikundu u boxile leswaku mindyangu yinharhu ya vamakhelwani yi vile yi ngheneriwa hi vhiki rin’we. “Muganga wa ka hina a wa ha hlayisekanga, ha chava na ku famba na visiku hikokwalaho ka migingiriko ya vukhamba”, ku boxa muaki.

Vurhangeri bya muganga byi komberile va xinawu leswaku va tirha hi matimba ku hlayisa vaaki. Vaaki va tlherile va komberiwa ku vika timhangu ta muxaka lowu emaphoriseni ya le Saselamani loko ku ri na leswi va swi ehleketelelaka. Hambiswiritano, a ku na khamba na rin’we leri nga khomiwa ku fika sweswi kumbe ku ehleketeleriwa.