NTOMBI YA MUTSONGA A VA XIPHEMU XO SIMEKA BUKU
Hi Mapula Glashy Makoto
Mutlhokovetseri tlhelo mutlangi wa Swiphato swa Vatsonga, Masingita Shibambu, loyi a tivekaka hi vito ra xiteji ra Ntombi ya Mutsonga, u nghenerile eka riendzo ra ku endzela swikolo ra Dok Risimati Mathye, eka pfhumba ra ku simekiwa ka buku ya yena leyintshwa, “The Triumphant Mind”.
Riendzo leri ri endzerile swikolo eLimpopo ku avelana hi hungu ra buku na vadyondzi ku nga si va na xiendlakalo lexikulu eJoni. Swikolo swi endzeriwile va tlhela va rhumela marungula eka vadyondzi hi ti 11 Ndzhati 2026.
Dokodela Mathye na ntlawa wa yena va endzerile swikolo swa mune hi siku ra vumbirhi ra nkombiso leswi katsaka- Xikolo xa le Henhla xa Khatisa eMugangeni wa le Gumbani; Xikolo xa le henhla xa Ximun’wana eka Phaphazela; Xikolo xa le henhla xa Mbhanyele eka Mapapila; na Xikolo xa le henhla xa Humula emugangeni wa ka Mukhomi. Hinkwaswo swikolo leswi boxiweke laha henhla swi kumeka etindhawini ta ka Malamulele. Hi nkarhi wa marendzo, va vulavurile na vadyondzi hi nkoka wa dyondzo, ku titshemba na ku tirha hi matimba, hambiloko u hlangana na swigantlu swa vutomi.
Buku ya The Triumphant Mind, yi vulavula hi xitori xa riendzo ra Dokodela Mathye kusuka emugangeni wa ka Phaphazela kuya eka ntirho wa yena wa sweswi tanihi Xandla xa Mufambisinkulu wa Vufambisi bya Vukorhokeri bya Mati na Nkululo eka Ndzawulo ya Mati na Nkululo.
Mhaka ya yena yi tirhisiwa ku komba vadyondzi hilaha ku tiyimisela, dyondzo na langutelo lerinene eka swilo swi nga pfunaka vanhu ku hlula mitlhontlho na ku fikelela swikongomelo swa vona.
Ku nghenelela ka Ntombi ya Mutsonga swi engeterile rito ra ndhavuko ro tiya eka phurojeke. Hi ku tirhisa vutlhokovetseri bya yena bya Xitsonga na ntirho wa ndhavuko, u pfunetile ku tlakusa buku leyi na ku hlanganisa hungu ra yona na vantshwa na vaaki va Vatsonga hi ku anama. Vukona bya yena a byi hlanganisa nkombiso na vutivi bya ndhawu na ku tinyungubyisa, ngopfu-ngopfu eka vadyondzi lava humaka eka Phaphazela na le migangeni ya le kusuhi.
Ku simekiwa ximfumo ka ‘The Triumphant Mind’ ku ta va kona hi Mugqivela, 03 Nhlangula 2026, eEmperors Palace eKempton Park, Gauteng. Vadyondzisi, swirho swa vaaki, vanghana na vaseketeri va languteriwa ku va kona eka leswi vahlengeleti va swi hlamuselaka tanihi leswi tlulaka ku simekiwa ka buku loku tolovelekeke.
Maendzo ya xikolo ya kombisa leswaku phurojeke yi tlhela yi va ya ku yisa hungu ra buku hi ku kongoma eka vadyondzi na miganga eLimpopo, ku nga ri ku rhurhela xiendlakalo xa ximfumo ntsena eJoni.