N’WAMABINDZU A NYIKIWA XIGWEVO

Hi Themba Chauke

Xiyenge xo lwisana na vukungundzwana xa xifundzakulu xa Limpopo xi kotile ku sirhelela xigwevo ehenhla ka n’wamamabindzu wa ndhuma eGiyani Howard Alex Mashaba wa malembe ya 45, endzhaku ka ku khomiwa na ku chuchisiwa hi swihehlo swo chavisela na ku tlula milawu ya xileriso xa xisirhelelo.

Mashaba, i n’wamabindzu loyi a nga na mabazi xikan’we na tihotela eGiyani na tin’wana tindhawu, naswona a tivonakarisile emahlweni ka khoto hi swihehlo swo tlula nawu wa xileriso xa xisirhelelo xa khoto xikan’we na ku chavisela. Leswi swi ta endzhaku ka mhangu leyi humeleleke hi 4 Mawuwana 2024, loko Mashaba a ta suka a kongoma emutini wa mumangari eka yindlu leyi a yi hireke eka ndzawulo ya mitirho ya vaaki. Loko a fika, ku hehliwa leswaku Mashaba u lerisile wansati loyi ku huma endlwini, a vula leswaku u xavile yindlu leyi.

Mumangari u arile a vula leswaku u tshama eka yindlu leyi hi nawu. U tlhele a hehla leswaku Mashaba na vanhu lava a famba na vona va n’wi chaviserile hi ku tsema gezi endlwini leyi xikan’we na ku penda makhumbhi hi mavala yo tshwuka, leswi a vulaka leswaku i swixungeto swa rifu.

Wansati loyi u vuye a kongoma ekhoto ya majisitarata wa Giyani hi siku ra 5 Mawuwana 2024 laha a nga endla xikombelo xa xisirhelelo xa khoto ehenhla ka Mashaba. Xileriso xi vuye xi nyikiwa Mashaba, laha a nyikiweke siku ro tivonakarisa ekhoto.

Hambiswiritano, hi siku ra 2 Mhawuri 2024, ku vuriwa leswaku Mashaba u chaviserile wansati hi nkarhi lowu a a ri entirhweni emahlweni ka vatirhikuloni, xikan’we na ku n’wi rhukana.

Mumangari u mangarile mhaka leyi ekhoto ya majisitarata wa Giyani, leyi tekeke xiboho xo khoma Mashaba. Mhaka leyi yi vuye yi yisiwa eka xiyenge xo lwisana na vukungundzwana ePolokwane leswaku yi lavisisiwa.

Mashaba u vuye a khomiwa hi siku ra 21 Mhawuri 2024 laha a nga ya tivonakarisa emahlweni ka khoto ya majisitarata wa le Giyani ko hlaya. Hi ti 08 Khotavuxika 2026, u voniwile nandzu eka swihehlo haswimbirhi, leswi katsaka ku chavisela xikan’we na ku tlula nawu wa xileriso xa xisirhelelo xa le khoto. Mhaka leyi yi vuye yi hundziseriwa kuya eka ti 22 Ndzhati 2026, leswaku ku ta nyikiwa xigwevo.

Hi Ravumbirhi 22 Ndzhati 2026, khoto ya majisitarata wa Giyani yi gwevile Mashaba ndziho wa R10 000 kumbe tsevu wa tin’hweti ekhotsweni hi swihehlo swo chavisela, laha ku nga tlhandlekeriwa tin’hweti ta 12 leti hundziseriweke emahlweni hinkwato ku ringana malembe ya ntlhanu ehenhla ka swipimelo swo karhi.

Eka nandzu wa vumbiri, u gweviwile ndziho wa R15 000 kumbe tin’hweti ta Nkaye ekhotsweni hi ku tlula nawu wa xileriso xa xisirhelelo, laha na kona ku tlhandlekeriweke tin’hweti ta 12 ekhotsweni leswi hundziseriweke emahlweni hinkwaswo ku ringana malembe ya ntlhanu ehenhla ka swipimelo swo karhi.

Ends