Makhubele a Tlhelela eka Vandla ra ANC

Hi Mkateko Ndlovu

Tanihilaha a tshembhiseke ha kona, Ponani Makhubele, u tivisile ndlela leyi a nga yi teka eka migingiriko ya tipolotiki. “Ndzi vuyerile eka vandla ra ANC, naswona ndza khensa kuva ndzi amukeriwile nakambe,” ku vula Makhubele eka xihangalasa mahungu xa facebook. U kombisile ku khensa eka varhangeri va vandla ra ANC eka xifundzhantsongo xa Norman Mashabane, lava a vuleke leswaku a nge paluxi mavito ya vona, a vula leswaku a va vonanga nala eka yena kambe va n’wi nyikile ndleve hi nkarhi wa nkoka.

“Ndzi vile ni nkateko wo hlangana na Matsalana wa Xifundzhantsongo xa Mopani eka ANC, Sonia Ngoveni-Maswanganyi,” Makhubele u ya emahlweni U tlherile a vula leswaku endzhaku ka sweswo, u kotile ku hlangana na vurhangeri hinkwabyo bya xifundzhantsongo xa Norman Mashabane hi ku rhangeriwa hi Meyara wa Xifundzhantsongo xa Mopani, Pule Shayi; Xandla xa Mutshamaxitulu Dagma Mamanyoha, Xandla xa Matsalana Tsheko Musolwa; xikan’we na Mutamelankwama Sydwell Mabunda.

U kombisile leswaku a ku ri siku ra kahle swinene, kuva a hlanganile ni vurhangeri lebyi tanihileswi a ku ri siku ro sungula ra ku hlangana endzhaku ka nhlengeletano yo hlawula vurhangeri byintshwa. Kasi hi nkarhi wa kona yena a ha ri eka MK. U kombisile leswaku a nge vulavuli na munhu hi xiboho xa yena xa migingiriko ya tipolotiki, kambe leswi a vonaka swi ri na nkoka ku swi nyika vanhu, u ta swi paluxa, kambe enkarhini wa sweswi a nga lulamelanga ku angula eka mavonelo ya vanhu eka hungu leri a nga ri tsala eka Facebook, laha a nga ba xigandlo xa leswaku i xirho xa vandla ra ANC.

Kasi hi siku ra ti 19 Mudyaxihi, Makhubele u tivisile hi ta ku sukela vandla ra MK, laha a nga hehla maendlo ya swirho swa vandla ku endla leswaku a teka xiboho lexi. ‘’A ndzilo ehleketa ku pfuka ndzi tshika ntirho, ndzi landzelerile endlelo rin’wana na rin’wana leri ri lavekaka. Mbilu ya mina ya vava swinene hikuva un’wana wa lava a ndzi tirha na vona u byerile swirho swa vandla ra MK leswaku va fambela kule na mina,” ku hlamusela Makhubele loyi a ri xandla xa Mululamisi wa Migingiriko ya vandla ra MK eka xifundzhankulu xa Limpopo laha a nga vula leswaku vandla ra MK a ri na ntiyiso.

U kombisile leswaku a nga khomekanga kahle kusukela a sungurile ku tirha eka vandla ra MK hikokwalaho ka vatirhi kulorhi lava va ranghisaka ku navela ka vona ku nga ri vanhu, naswona u xanisiwile emiehleketweni hi muhlanganisi na muhlengeleti wa swa timali eka vandla ra MK eka xifundzhankulu. U vurile leswaku leswi swi endlile leswaku a mangala nandzu, kambe a honisiwa.

Makhubele i khale a ri eka migingiriko ya tipolotiki, ku sukela eka Ligi ya Vantshwa ya ANC, Ligi ya Vantshwa ya Makhomunisi, ku kondza a thwasa ku ya eka vandla ra ANC. U tirhile eka masipala wa Giyani tanihi Mutshamaxitulu wa Vutihlamuleri bya Masipala eka matirhiselo ya swa timali. U tirhile tanihi xirho xa palamende ya tiko, na yin’wana migingiriko leyi a yi endleke ehansi ka vandla ra ANC, leri sweswi a tlheleleke eka rona.

U tikomba a tsakile ni ku tinyungubyisa kuva eka vandla ra ANC eka swifaniso leswi a swi hangalaseke eka papilla ra facebook ya yena. Kasi hi un’wana wa vanhu vo sungula ku hangalasa hungu ra nhlengeletano yo sungula ya vurhangeri byintshwa eka Vandla ra ANC eka Xifundzhantsongo xa Norman Mashabane, Laha ku humesiweke na hungu ra ku amukeriwa ka yena ximfumo hi vurhangeri bya vandla ra ANC.