Ku Ngungumerisa Timovha swi Kavanyetiwa

Hi Themba Chauke

Maphorisa ya Xifundzhankulu xa Limpopo va tlakusile migingiriko yo lwisana na ku yiviwa ka timovha ku tsemekanya ndzilikani, xikan’we na ku ngungumerisiwa, endzhaku ko kuma timovha to hlaya leti a ti kongoma etikweni ra Zimbabwe hi vhiki rin’we. Eka pfhumba leri ra ha ku endliwaka, Xipano xo Hlawuleka eMusina, xi kavanyetile ku tsemekanyisiwa ka movha wa Toyota Corolla Cross, eBergview hi Ravunharhu ra ti 21 Mudyaxihi 2025, hi nkarhi wa 19:30.

Ku vuriwa leswaku movha lowu wu vikiwile ku va wu yiviwile eBrakpan, exifundzheninkulu xa Gauteng hi Sunguti 2025. Loko maphorisa ya ringeta ku yimisa movha lowu, muchayeri u engeterile rivilo. Endzhaku ko hlongorisiwa, muehleketeleriwa u tshikile movha a baleka hi milenge a nghena enhoveni ya le kusuhi. Muehleketeleriwa a nga ha kumekanga, naswona maphorisa ya sungurile migingiriko ya hlota muehleketeleriwa leswaku a ta khomiwa.

Eka rin’wana pfhumba, xipano xa nhlengelo lexi katsaka xipano xo lwisana na ku ngungumerisiwa ka swilo, Khamphani ya Vurindzi ya Tshimollo. Xipano xa Vulavisisi, Khamphani ya Vurindzi byo lwisana na ku phanghiwa ka timhova ya Reflex, xikan’we na va Tracker SA, va kavanyetile movha wun’wana endzhaku ka ku kuma vuxokoxoko bya vuhlorhi.

Movha wa Toyota Rav4 wu kavanyetiwile hi kwalomu ka awara ya 20:00 kusuhi na Ndhawu yo Chela mafurha ya Shell ePolokwane, egondzweni ra N1. Movha lowu wu vikiwa kuva wu yiviwile eBrooklyn, exifundzheninkulu xa Gauteng hi mahelo ya vhiki. Muehleketeleriwa wa Muhlapfa wa xinuna wa malembe ya 43 u khomiwile naswona u languteriwa ku tivonakarisa emahlweni ka khoto ya Majistarata wa Polokwane hi Ravutlhanu wa ti 23 Mudyaxihi 2025.

Ku kumiwa ka timovha leti i xiphemu xa pfhumba rikulu leri endliweke kusuka hi Ravumune ku fika hi Nsoto na vusiku, leswi endleke leswaku ku kumiwa timovha ta 12 leti a ti yiviwile. Pfhumba leri ra nhlengelo ri katsa swiyenge swo hambana-hambana swa maphorisa, Tracker na Tikhamphani ta Maphorisa to tiyimela. Eka timovha leti kumiweke, ntsevu wa tona a ti vekiwile switirhisiwa swo landzelerisa.

Timovha leti ti kumiwile etindhawini to hambana-hambana leti ti katsaka kusuhi na ndzilikani wa Beitbridge, Polokwane, Mokopane na Witbank. Timovha hinkwato a ti yiviwile kumbe ku phanghiwa exfundzheninkulu xa Gauteng Timovha leti kumiweke ti katsa nkombo wa ti Toyota Corolla Cross, Ti Toyota Hilux timbirhi, Nissan Navara yin’we, Ford Ranger yin’we, xikan’we na Nissan 1400 yin’we. Ku khomiwile vaehleketeleriwa va ntsevu eka pfhumba leri.

Khomixinara wa Maphorisa ya Xifundzhankulu xa Limpopo Leutanant-Jenerali Thembi Hadebe, u hoyozerile ntirho lowu endliweke hi maphorisa. “Ku kumeka ka timovha leti swi kombisa ku lahlekeriwa swinene eka vaendli va vugevenga lebyi, naswona maphorisa na lava hi tirhisanaka na vona va tirha hi matimba ku lwisana na maendlelo lawa ya chavisaka vaaki na ikhonomi ya hina, vulavisisi bya maphorisa byi ya emahlweni