Ndlela ya ku endlela swifuwi swakudya

Hi Mkateko Ndlovu

Hi mikarhi ya xixika swifuwo swi hlangana na mitlhotlho ya ku pfumaleka ka swakudya tanihileswi swimilana swi tikeriwaka ku kula hikokwalaho ka xirhami. Hi nkarhi wa xixika, misava ya oma yi tsandzeka ku humesa swakudya. Hambiswiritano vafuwi va exifundzhankulu xa Limpopo etindhawini ta Vhembe va langutanile na mitlhontlho ya ku pfumaleka ka swakudya swa swifuwo.

Ntllawa wa Varimisi hi ku rhangeriwa hi Tatana Manyatshe Rudzani Raymond, kusuka eVhembe, va tile ni tindlela ta ku kuma swintshuxo eka swiphiqho leswi, hikuva va endla swikambelo swa furhu emigangeni leyi rhendzaleneke na masipala wa Masipala wa Thulamela.

Swikambelo leswi swi kongomisiwile eka ku nyika vutivi eka van’wamapurasi va ndhawu liya hi nkoka na vuswikoti byo humelerisa swakudya swa swifuwo swa vona. Kungu leri a ri lavi ntsena ku hunguta ku pfumaleka ka swakudya leswi langutaneke na van’wamapurasi va swifuwo kambe ri tlhela ri hlohlotela ku tiyimela eka van’wamapurasi lavantsongo.

Xipano xa Varimisi xi endlile nkombiso wa vuhlengeleti lebyi endliweke hi byanyi na mati ya mimova emugangeni wa Tshilungwi. Ku ndlandlamuxa nkoka wa swakudya swa furhu xikan’we na ku nandziha. Endlelo leri ri katsa ku virisa byanyi bya rihlaza na mati ya mimova leswi tshamaka kuringana 21 wa masiku ku ya fika eka nkarhi lowu lavekaka eka diromu leri pfariweke swinene.

Xiendlakalo lexi xi lulamerile eka swifuwo swo hlaya kumbe swintsongo. Ku tirhisiwa loku humelelaka ka nkombiso lowu swi ta pfuna swinene eka mitlhotlho ya swakudya swa swifuwo leswi khumbhaka van’wamapurasi va swifuwo xikan’we na ku tisa ntshamiseko eka vufuwi.