Nhlangano wu Amukela ku Hlongoriwa ka Omotoso
Hi Themba Chauke
Nhlangano wa NotInMyName International, wu amukela ku Hlongoriwa ka Timothy Omotoso laha tikweni, Muhlapfa wo huma etikweni ra Nigeria, loyi ku vuriwaka leswaku u tlurile nawu wa Vuhlapfa. Nhlangano wu vula leswaku leswi i xikombiso xa leswaku timhaka ta Vuhlapfa ni Xiphorisa va nga swi kota naswona va fanele ku tiyisisa leswaku vanhu lava va tlulaka Milawu ya Vuhlapfa xikan’we na ku endla vugevenga va tekeriwa magoza.
Va vula leswaku va amukela leswaku Vahlapfa vo hlaya laha tikweni va lendzelela nawu wa tiko, kambe a va nge honisi maendlelo ya vahlapfa lava va tinghelerisaka eka timhaka ta vugevenga kumbe ku tshama ku tlula masiku lama pimiweke hikokwalaho ka vumunhu bya vaakatiko va Afrika-Dzonga.
“Hikokwalaho ka leswi, hi kombela voko ra nawu ku tirha hi matimba, ku khoma, ku tengisa xikan’we na ku hlongola vanhu lava tlulaka Milawu ya Vuhlapfa na Vahlapfa lava endlaka timhaka ta vugevenga lava va xungetaka vuhlayiseki bya vaaki xikan’we ni vusirheleri bya tiko,” ku vula Themba Masango, Matsalaninkulu wa nhlangano.
U yile emahlweni a vula leswaku leswi a hi ku tiyisisa voko ra nawu ntsena, kambe na ku sirhelela Vaakatiko va Afrika-Dzonga, ku hlayisa xindzhuti xa Milawu ya Vuhlapfa, xikan’we na ku tiyisisa leswaku lava va nga kombisiki xichavo eka tiko ra Afrika-Dzonga va byara vutihlamuleri, laha a vuleke vanhu lava va nga laha tikweni hi xikongomelo xo tshova milawu ya tiko va fanele ku susiwa laha tikweni.
“Hi kombela mfumo wa hina ku tiyisisa vulawuri bya mindzilikani, ku hatlisisa ku fambisa Vahlapfa lava tlulaka Milawu, xikan’we na ku tirhisana na matikomambe ku sivela ku tekeriwa ehansi ka timhaka ta Vuhlapfa ta laha tikweni,” Masango wa gimeta.
