12000 wa Mitirho eVhembe

Hi Mkateko Ndlovu

Hi siku ra ti 22 Mudyaxihi 2025, varhangeri kusuka eka xifundzhantsongo xa Vhembe a va khomile nhlengeletano na Tihosi laha a va burisana hi mayelana na ndlela yo antswa ya ku fambisa tiko tanihiku vanhu lava tshamaka etikweni va rhangeriwa hi Tihosi.

Varhangeri va Xifundzantsongo xa Vhembe kusuka eka timasipala to hambana-hambana va vonile swi fanerile leswaku loko va ha lulamisela ku endla mpimanyeto wa swa timali, va fanele ku sungula va vitana Tihosi leswaku va ta va na mbhurisano na vona mayelana na swilaveko leswi kayivelaka emigangeni yo hambana-hambana laha va fumaka kona.

Tihosi hi tona ti tivaka vanhu va tona ni miganga ya tona, kambe hambiswiritano Tihosi ti kombisile leswaku ta khensa swinene kuva va xifundzantsongo xa Vhembe va tekile goza leri koxaka vutivi eka tona ku nga se endliwa mpimanyeto wa swa timali. Tihosi ti kombisile leswaku ti kombela ku teka xiave eka tihlengeletano tin’wana ni tin’wana leti timasipala ti va ka na tona.

Tihosi ti kombisile leswaku maendlelo ya timasipala yo endla migingiriko emisaveni ya tihosi ehandle ka mpfumelelo kusuka eka Tihosi swi fanele ku fika emakumu hikuva i maendlelo ya ku tsan’wa vinyi va misava. Nhlokomhaka leyi a ku vulavuriwa hi yona a ku ri ku rhangisa swilaveko swa vaaki emahlweni ni ndlela ya ku nyika vukorhokeri bya gezi, mati, mapatu ni mitirho eka vantshwa.

Tihosi ti kombisile leswaku nhlengeletano yo fana ni leyi a ku vi nhlengeletano leyi nga ta va kona nkarhi na nkarhi va nga yi eka Tihosi loko va vona nhlawulo ntsena. Mutshami wa xitulu wa xifundzhantsongo xa Vhembe tatana Tshitereke Matibe u kombisile leswaku hinkwaswo leswi nga vuriwa hi Tihosi va swi twile naswona swihoxo swa vona va swi amukela. Matibe u kombisile leswaku kusukela sweswi va ta sungula ku khoma tihlengeletano na vurhangeri bya tihosi xikan’we no hlonipha vinyi va misava.

U kombisile leswaku xifundzantsongo xa Vhembe ku navela ka vona i ku tumbuluxa tipurojeke leti nga ta nyika vantshwa mitirho, vakombisa leswaku ku navela ka vona i ku humesa swivandla swa mitirho ya 12000.