Homu 14C yi ba yi Khomile

Hi Mutsari wa Hina

Xipano xa bolo ya Milenge xa Homu 14C xi rhumerile hungu endzhaku ka ku hlula xipano xa Dingamazi hi tigolo ta 5-1, eka ntlango lowu a xi tekile vulawuri bya ntlango lowu a wu ta hela hi 6-0 kumbe kutlula loko tin’wana tigolo a ti nga ariwanga. Ku hlula loku ku rhumerile hungu ro hlamarisa eka mphikizano lowu, laha vanhu vohlaya va kombisaka leswaku xipano xi wela eka swipano leswi swi nga ta lwela xidlodlo eka mphikizano wa Mayor’s Cup wa masipala wa Giyani 2025. Endzhaku ka ntlango, bulo leri a ri ri kona eka xiyenge xa mabulo ra Whatsapp, laha ku nga na swipano swo hlaya swa le Giyani, vanhu va hlamarisiwile hi matlangelo ya xipano lexi a xi nga se tshama xi fika eka swipano swo hetelela swa mune eka mphikizano lowu.

Hambileswi vanhu va vulaka leswaku xipano xa Shawela hi xona lexi xi languteriweke ku kuma xidlodlo xa Mayor’s Cup, ku na mavonelo man’wana ya leswaku Xipano xa Homu 14C xi nga ha hlula eka mphikizano lowu. Un’wana wa vafambisi va SAFA eGiyani, Jay-Jay Rikhotso, u vurile leswaku xipano xa Homu 14C, xi tlanga kahle ngopfu, hi ku tirhisa matimba ya vantshwa xikan’we na vatlangi va ntokoto vo fana na Royce na Six Gun, leswi swi nga ta tikisela swipano leswi xi nga ta hlangana na swona, hikuva xipano xa Homu 14C xi nga ha hlamarisa votala. Kasi enkarhini wa sweswi, swipano leswi a swi languteriwile leswaku swi ta hlula eka mphikizano lowu se swi humile, laha ku saleke swipano leswi swi ntshwa leswi swi tisaka ku cinca eka ntlango wa bolo ya milenge eGiyani.

Ntlango wun’wana na wun’wana a wu tiveki leswaku wu ta tlanga njhani enkarhini wa sweswi, hikuva mphikizano wu pfulekile, leswi swi endlaka leswaku mphikizano lowu wu ta na swihlamariso. Loko ka ha languteriwile sagwadi ra R55 000, nyanyuko wa swipano swa mune leswi nga sala wu le henhla, naswona vaseketeri va nga ha langutela mitlangu yo nyanyula swinene leyi yi nga ta yimisa vahlaleri hi milenge.

Kasi eka van’wana, leswi swi nga ha hundzuka ntiyiso wa milorho ya vona, loko van’wanana va ta tshoveka timbilu. Swin’wana leswi swi endlaka leswaku ku va na nyanyuko wa xiyimo xa le henhla hi leswaku masipala wu vekisile macheleni yo hlaya eka swipano swa mune tanihileswi swi languteriweke ku bukuta magidigidi ya tirhandi eka swipano swa mune leswi swi nga sala, leswi swi endlaka leswaku mphikizano lowu wu nyanyula swinene.