Rivala ra Mitlangu ri Antswisiwa

Hi Themba Chauke

Migingiriko yo antswisa rivala ra mitlangu ra Giyani yi sungurile nakambe endzhaku ka ku yima bya xitshuketana, leswi swi siyeke vaaki na varhandzi va mitlangu va nga tivi leswaku xana ku antswisiwa ka rivala leyi swi nga ha fika emakumu ke.

Rivala leri ku tlangeriwaka eka rona, ri vuriwa kuva ri-ri ku lulamisiweni swinene, leswi swi katsaka ku byariwa ka byasi tanihi matshalatshala ya masipala wa Giyani ku antswisa rivala leswaku ri va na vuswikoti byo rhurhela mitlangu ya swipano leswi swi nga le ka ligi ya Betway. Phurojeke leyi ya ku antswisa rivala yi sungurile hi n’hweti ya Mudyaxihi lembe roleri, naswona a ri languteriwile leswaku a ri fanele ku fika emakumu exikarhi ka n’hweti ya Mhawuri hi mikarhi ya mitlangu ya thonamete ya Meyara wa masipala wa Giyani.

Hambiswiritano, ku vile na ku hlwela eka migingiriko ya phurojeke, leswi swi nga tlhela swi khumbha na mitlangu yo hetelela wa thonamete ya Meyara, leswi siyeke swipano leswi a swi fanele ku tlanga mitlangu leyi swi nga tivi leswaku swi nga ha tlanga rini ntlango lowu ku lwela xidlodlo xa mphikizano lowu.

Kasi tanihileswi ntirho wo antswisa rivala wu yaka emahlweni, leswi swi tisa ntshembho eka vatlangi, vadzaberi xikan’we na vaseketeri. Votala va tshembha leswaku ku hela ka ku antswisiwa ka rivala swi nga ha fika emakumu ku nga se hela nkarhi wo leha, leswi swi nga ta endla leswaku mitlangu yo hetelela ya thonamete ya meyara yi ta tlangeriwa eka rivala ra xivumbeko xintshwa ra Giyani.

Ku gimetiwa ka thonamete tanihilaha swi kunguhatiweke ha kona, a swi nge tisi nyanyuko ntsena eka varhandzi va ntlango wa bolo ya milenge kambe swi ta tlhela swi tisa mbuyelo wa masagwati eka swipano leswi swi nga ta tlanga mitlangu leyi. “Hi tsakile ngopfu kuva hi tikuma hi fikile laha hi nga kona, naswona ku tele nyanyuko eka xipano xa hina,” ku vula Hlawu Ndlovu, mudzaberi wa xipano xa Atletico, xin’wana xa swipano swa bolo ya milenge ya vaxisati leswi swi koteke ku fikelela ntlango wo hetelela.

 “Hi yimerile ntlango wo hetelela hi mahlo-ngati, kumbexana sagwati ra R50 000 i ra hina. Vatlangi va tirhile hi matimba ku fika eka xiyimo lexi, naswona hi tiyimiserile ku humesa vuswikoti bya hina hinkwabyo. Lexi hi xi lavaka sweswi i siku ro tlanga ntlango wo hetelela leswaku hi ta sungula vutiolori.”

Ndlovu u tiyisisile leswaku ku hlula eka ntlango lowu swi ta vula swo tala ku tlula ntsengo wa macheleni. “Ku va vahluri eka thonamete leyi swi ta tisa nhlohlotelo wukulu eka tintombhi xikan’we na ku tinyungubyisa eka vanhu hinkwavo lava va seketeleke xipano kusuka emasunguleni ku fika sweswi,” u ya emahlweni. A vula marito lawa endzhaku ka swikombiso swa leswaku ntlango wa bolo ya milenge wa kula swinene etindhawini ta Giyani, laha ku yimeriwaka ku pfuriwa ximfumo rivala ra mitlangu ra Giyani.

Loko a vutisiwa hi mafambelo ya ku antswisiwa ka rivala ra mitlangu ra Giyani, na leswaku swi nga ha koteka leswaku mitlangu yo hetelela yi nga ha khomiwa eka rivala leri ri antswisiweke, muvulavuleri wa masipala wa Giyani Steve Mavunda u vurile leswaku ku antswisiwa ka rivala swi ta fika emakumu ku nga ri khale leswaku mitlangu yo hetelela ya thonamete ya meyara yi ta tlangiwa.

 “Ku navela ka hina i ku heta ku antswisa rivala hi nkarhi lowu wu nga hetiki mbilu leswaku ku ta tlangiwa mitlangu leyi. Hambiswiritano, loko swo humelela leswaku ri nga heli hi nkarhi lowu hi wu kunguhateke, makungu ya hina i ku ya emahlweni ku ya tlangiwa mitlango leyi yo hetelela, swi nga ha endleka leswaku yi tlangiwa eka rivala leri a hi ri tirhisa ku tlanga mitlangu leyi yi nga hela, kumbe eka timbala ta mitlangu ta le migangeni ya ka hina,” wa hlamusela.

Mavunda u tlherile a kombisa leswaku mitlangu yo hetelela a yi nge tlangiwi hi nkarhi wa tidyondzo leswaku swi nga kavanyeti vadyondzi loko va tsala swikambelo swo hetelela swa lembe. “Hi ta tekela enhlokweni nkarhi wa swikambelo tanihileswi hi nga laviki ku kavanyeta swikambelo swa vadyondzi, leswi swi vula leswaku loko hi ta veka siku, ku ta va endzhaku ka ku tsariwa ka swikambelo swo hetelela swa lembe.”

Tanihileswi migingiriko yo antswisa rivala yi nga le ku yeni emahlweni, vanhu va le Giyani va langutile hi mahlo-ngati, ku vona leswaku ku antswisiwa loku ku ta fana na timbala ta masiku lawa